“Ha’u hanoin ba Austrália nian kuaze 5 mil ona mak ita haruka ba Austrália, e ba Korea kuaze iha 3 mil ital, mak ita haruka ona ba servisu iha Korea”, dehan Diretór Ezekutivu Sekretariadu ba Estratéjia Nasionál no Empregu (SENE-SEFOPE), Jenifer Antonio da Costa Pui, hafoin audénsia ho Prezidente Repúblika José Ramos Horta, iha Palásiu Prezidensiál Bairo Pite, sesta (17/06).

Ba programa ne’e, Governu kontinua hala'o hodi haruka joven sira ba servisu iha raí liur, tanba hanesan públiku hotu hatene ne'e la'ós segredu ona maibé liuhusi programa ne'e bele reduz dezenpregu iha rai laran.

Aleinde, SEFOPE mós kontinua buka dalan atu oinsá bele servisu hamutuk ho setór privadu, sentru Formasaun sira atubele forma imediata joven timoroan sira hodi bele responde ba nesesidsde merkadu traballu iha rai laran.

Maibé mekanizmu kona-ba servisu iha Austrália ne'e dahuluk tenke hatene lian-inglés atu iha komunikasaun ho empregadór sira iha Austrália no daruak mak tenke saúde di'ak, tenke iha fiziku di’ak.

Tanba servisu setór agrikultura iha Austrália ne'e ema hotu hatene servisu todan oituan, presiza saudavel, no iha fiziku di’ak atubele halo servisu.

Nune'e mós ba Korea ne'e dala barak joven sira hetan servisu iha área peska mak barak liu entaun ida ne'e joven sira tenke kuidadu saúde, nomós ejize tenke hatene lian-Korea, nomós fiziku.

“Tanba servisu peska ne'e todan e dala ruma sira bele hela iha tasi laran to'o fulan ida hanesan ne’e bele sai dala ida rai maran. Ida-ne'e servisu sira ne'ebé mak ba Korea nian”, esplika nia. (*)