“Ohin, Membru Parlamentu Nasionál mai lori PN nia naran mai kumprimenta hodi hato’o ofisialmente direita kongratulasaun no felisitasaun ba Arsebispu Dom Virgílio ne’ebé Amu Papa nomea sai Kardeál dahuluk Timor-Leste nian”, dehan Prezidente PN, Aniceto Guterres, ba jornalista sira iha Kámara Eklesiástika Arkidiozese Metropolitania Dili, iha Lesidere.
Tanba kna’ar foun ne'ebé mak atribui husi papa Francisco ba Dom Virgilio, mak Parlamentu Nasionál liuhusi reuniaun plenária iha loron 30 fulan-maiu liuba aprova ona votu kongratulasaun ba Dom Virgílio do Carmo, nune'e aproveita mai entrega mós rezolusaun votu Parlamentu Nasionál (PN) nian ba Arsebispu.
Parlamentu Nasionál deside hotu tanba nu’udar órgaun soberania polítika no reprezenta povu tomak ne’ebé povu Timor-Leste maiória katólika sente kontente no orgullu ho nomeasaun ne'ebé Amu Papa fó ba Bispu timoroan nian.
Ba kongratulasaun ne'e, Arsebispu Aekidioseze Metropolitana Dili, Dom Virgílio do Carmo hatete nia parte apresia nomós hato'o agradesimentu ba PN, ba kna’ar foun ne'ebé sei simu iha loron 22 fulan-agostu tinan 2022.
Dom Vergilio mós haree katak oportunidade ida-ne’e hatudu duni ksolok husi povu no uma kreda Timor-Leste ne'ebé manifesta sira-nia votu inklui reprezentante povu iha uma fukun, ida-ne’e nu’udar ksolok ida husi timoroan hothotu. (*)