“Sé la'e ita bele kria fali merkadu frutajidu iha fali palásiu, di'ak lori ai-fuan sira husi Bidau Lesidere hodi ba tau hotu iha palásiu prezidente, ne'e hatudu imajen ida ladun di'ak. Nu’udar deputadu ha’u hakarak atu hatudu imajen ida di'ak ba públiku no ba mundu dehan katak palásiu ba prezidente repúblika ho funsionáriu, la'ós palásiu ba fa’an ai-fuan iha ne'ebá”, dehan nia iha plenária Parlamentu Nasionál, tersa (28/06).
Tanba Palásiu Prezidente Repúblika ne'e la'ós halo ba bazár, atu ema hothotu lori ai-fuan ba fa’an hotu iha ne'ebá, ida-ne'e hatudu imajen la di'ak ba públiku no ba mundu.
Maske inisiativa Xefe Estadu atu ajuda ninia sidadaun ai-leba sira ne'ebé mak fa’an ai-fuan maibé tenke buka fatin ida ne'ebé dignu para asesor no funsionáriu bele sosa ai-fuan sira ne'ebé mak fa’an husi sidadaun ai-leba.
Deputada bankada FRETILIN, Helena Martins Belo hatete, nia parte la deskrimina diretu ai-leba sira ne'ebé mak hakarak buka moris, maibé propoin ba Xefe Estadu atu organiza ai-leba hothotu ba fa’an sira-nia ai-fuan iha pálasiu.
“Sé hanesan ne'e ai-leba sira iha Dili laran ne'e atende hotu ba, ne'e para Prezidente ne'e ba hothotu, tanba labele mak grupu ki'ik-oan ida mai iha ne'eba depois halo tan bazár fatin iha ne'eba ne'e estadu no simbolu nasaun ninian ne'e tau iha ne'ebé, siknifika oinsá, ida-ne'e mak ami kestiona”, afirma nia. (*)