“Ha’u konvida ita hothotu atu rona esklaredimentu husi Ministru no Sekretáriu Estadu sira atu labele interpreta sasán sesta bázika ne’e sai fali polítika”, dehan nia iha lansamentu Sesta Aázika ba faze daruak iha Postu Administrativu Laklubar, Munisípiu Manatutu, tersa (28/06).
Tanba programa nasionál Sesta Bázika ne'e programa Governu nian atu fó ba komunidade liliu sira ne’ebé kbi’it la’ek, hanesan rekoperasaun ekonomia.
“Karik ita sira simu, tama iha klasifikasaun kbi’it laiha, nune’e mós administradór sei hetan karik administradór tama iha klasifikasaun ida-ne’e maibé labele interpreta fali ka politiza fali katak ne’e sai elimentu ou fatór polítika ruma ne’ebé atu halo ba komunidade ida-ne’e”, afirma nia.
Ba programa ne’ebé mak Governu hala’o, tanba iha responsabilidade ba povu tomak, la’ós tanba interese, maibé Governu nia interese mak povu moris hakmatek no moris dignu.
Sekretáriu Estadu Kooperativa (SEKOOP), Elizário Ferreira hatete, programa ne'e la’ós polítika maibé atu halo kompleta iha vida família nian.
“Programa Distribuisaun sesta bázika la’ós polítika maibé meramente atu kompleta malu iha nesesidade família nian”, dehan nia.
Programa sesta bázika ne’e programa rekoperasaun ekonomia ne’ebé Governu sosa produtu sira husi komunidade ne’ebé fa'an hodi fahe fali ba povu sira. (*)