“Preokupasaun ne'ebé komunidade sira hasoru maka, kondisaun estrada ne'ebé at, la iha postu saúde iha suku, kondisaun Eskola ne'ebé kontinua at nomós husu atu hari’i loja do povu iha suku”, dehan Xefe Suku Lontas, Alípio Belo, iha atividaee diálogu ne'ebé hala'o husi Ministériu ba Asuntu Parlamentár no Komunikasaun Sosiál (MAPKomS) iha Suku Lontas, sesta (01/07).

Durante iha atividade diálogu, Ministru ba Asuntu Parlamentár no Komunikasaun Sosiál, Francisco Martins da Costa Pereira Jeronimo hatete, diálogu ne'ebé mak hala'o husi Governu ho komunidade suku Lontas ne'e atu aprezenta klaru liután ba komunidade kona-ba politika no Programa husi Governu daualu nian.

“Ohin ha'u mai atu hasoru no ko'alia buat ne'ebé loloos ho ita-boot sira kona ba polítika no programa Governu nian”, dehan nia iha atividaee diálogu ho Komunidade iha Suku Lontas, Postu Administrativu Lolotoe, Munisípiu Bobonaru, sesta  (01/07).

Iha diálogu ne'e hetan partisipasaun direta husi Ministra Saúde, Odete Maria Freitas Belo, Vise Ministru Administrasaun Estatál, Lino de Jesus Torrezâo, Prezidente Bee Timor Leste, reprezentante Sekretáriu Estadu Kooperativa, reprezentante autoridade munisipál, Xefe suku sira Postu Administrativu Lolotoe nian nomós komunidade suku Lontas. (*)