Maibé ANPM desmente kuantidade kombustivel menus iha Timor Leste, tanba kuantidade konbustivel sei sufisiente ba nesesidade konsumidór sira.

Tuir informasaun ne’ebé www.tempotimor.com , asesu husi ANPM, kinta (28/07) katak, ANPM hakarak informa ba públiku katak fornesementu (Stock) kombustivel (Gazolina no Gazoleo) iha armazen boot rua hanesan Pertamina International Timor (PITSA) iha Praia dos Coqueiros no Esperanca Timor Oan (ETO) iha Hera sufisiente hela hodi bele atende nesesidade konsumidór iha Timor laran tomak.

Tanba ne’e ANPM mós hakarak informa katak oras ne’e dadaun Ró tula kombustivel atraka ona iha Ponte Kais Armanezen Kompaña PITSA nian no sei halo deskaregamanetu ohin loron kuantidade Gazolina hamutuk litru tokon 2 resin (2.494.372 litru) no Gazoleo tokon 1 resin (1.632.203 litru).

Enkuantu ANPM sei konfirma kuantidade kombustivel iha Armazen Kompañi ETO nian, maske nune’e, kompaña ETO fó sai ona iha sira-nia pájina mídia sosiál katak sira iha rezerva kuantidade ne’ebé sufisiente.

Kompaña PITSA no ETO hanesan distributor boot rua iha Timor-Leste sempre importa kombustivel tuir kalendáriu importasaun nomós depende ba nesesidade iha rai laran. To’o agora laiha interupsaun ba kalendáriu importasaun kombustivel.

Ho nune’e ANPM apela ba públiku katak atu la presiza pániku ho rumores ka boatus kona-ba kombustivel menus iha armazen ho retallu sira. Ho kolaborasaun di’ak tomak hamutuk ho importadór sira ho postu abatesementu kombustivel sira hotu ANPM sei garantia distribuisaun kombustivel iha merkadu ho efetivu no efikas.

Entretantu informasaun ne’ebé fó sai husi pájina ofisiál ETO, kinta (28/07) husu ba kliénte sira hotu katak; lalika pániku, tanba ETO sei garante katak stok mina sei sufisiente ba ema hothotu nia nesesidade no atividades diária.

Nune’e ETO husu ba konsumidór sira atu labele pániku hodi sosa mina, tanba konbustivel sei iha ba nesesidade kosumidór sira. (*)