“Ami husi Federal Insurance mai hasoru malu ho Prezidente Repúblika hodi husu Xefe Estadu nia disponibilidade atu partisipa iha semináriu ne'ebé ami sei organiza iha loron Sesta (12/08) ko'alia kona-ba Federal Insurance”, dehan Perosi Su'a iha Palásiu Prezidensiál Bairo Pite, kuarta (10/08).
Tanba durante Federal Insurance ejiste iha Timor-Leste, ne'ebé sai hanesan mos empreza ida servisu iha área insurance no investimentu públiku no privadu sira iha área konstrusaun nian.
“Hanesan konkreta ne'ebé ami halo mak seguransa sosiál ba área konstrusaun no semináriu ne'e ajuda tebes Governu atu promove servisu seguransa sosiál”, esplika nia.
Maske konvite ne'e rasik, Prezidente Repúblika laiha disponibilidade atu ba partisipa no sei delega de'it nia reprezentante maibé Federal Insurance espera katak atividade semináriu ne'e sei lori pasu pozitivu boot ida ba Timor-Leste.
“Ami hein katak hafoin semináriu ne'e, bele iha feedback pozitivu husi parte Governu kona-ba seguransa sosiál”, hatete nia.
Prezidente Repúblika rasik apresia servisu liga ba seguransa sosiál ne'e importante, tanba bele ajuda benifisiáriu sira seguransa sosiál direita, bainhira hetan asidente ruma.
“Xefe Estadu apresia loos ho servisu sira ne'ebé Federal Insurance halo iha área seguransa sosiál nian, nune'e hein katak servisu ne'e sei boot no benefisia ema hotu no hadi’a ekonomia Timor-Leste nian”, hatete nia. (*)