“Mai atu rona vizaun sira husi Prezidente Repúblika atu oinsá operasionaliza parte Ezekutivu nian ho vizaun hirak ne'e. Ne'ebé vizaun boot sira kona-ba Timor nia futuru kona-ba dezenvolvimentu setór sira ne'ebé importante ba rai ida-ne'e, ne'ebé PR liuhusi enkontru semanal hato'o ona ba Primeiru Ministru. Atu reforsa liután iha parte tékniku, implementasaun, ohin konvida ha'u rasik hanesan Munistru Prezidénsia, nomós señór Ministru Koordenadór, no señor Ministru Finansa”, dehan Ministru Prezidénsia Konsellu Ministru (MPKM), Fidelis Leite Magalhães hafoin finaliza enkontru ho PR Horta iha Palásiu Prezidensiál Bairo Pite, tersa (16/08).
Iha enkontru entre Prezidente Repúblika, marka prezensa husi Membru Governu na'in-3, tanba atu rona no haree liu parte legál juridiku Konstituisionál nian, parte Ekonomia no Finansa nian atubele iha sinerjia di'ak liu entre Governu ho Prezidénsia Repúblika, nia ekipa tékniku sira.
Husi vizuan hirak ne'e sei halo artikula ba ida-ne’e, atu lori duni rezultadu, no sinál ida katak iha relasaun institusionál ne’ebé metin liu entre órgaun soberania nian.
Tanba ne'e, rona vizaun hirak ne’e, atu lori hanesan bukae ida no parte téknika Governu nian mós sei anota hotu, hodi halo transformasaun iha tempu badak nune'e vizaun ida-ne'e bele sai realidade hanesan Estadu ida.
Durante audénsia ho Xefe Estadu, diskute mos área barak maibé área hirak ne’e relasiona ho koordenasaun polítika jerál Governu nian, no polítika lejizlativa Governu nian, no parte ekonomia nian mak Ministru Koordenadór Asuntu Ekonomiku, no relasaun ho parte finansas nian mak Ministru Finansas.
Purtantu entermu dezenvolvimentu fíziku, Governu atinje iha área barak no lansamentu buat barak ona, nomós iha fulan-novembru sei lansa tan Portu Tibar, Fiber Optika la’o ona, inklui Uma Kbi’it La’ek la’o hela.
Nune'e mós apoiu sosiál sira mós la’o dadaun hela liliu kona-ba investimentu estrada sira la’o hela, bee-moos la’o, kooperasaun internasionál sira mós la’o hela.
“Hatudu katak nasaun ne’e la’o ritmu ne’ebé di’ak, konsidera katak foin sai husi pandémia globál ida-ne’e no agora daudaun funu iha Ukránia ne’ebé afeta mundu tomak”, esplika nia.
Purtantu Prezidente Repúblika, José Ramos Horta, iha vizaun hakarak Timor-Leste tenke ba oin tuir kompromisu ne'ebé halo ho nasaun sira seluk, nomós iha rai laran. (*)