Sekretáriu Estadu Kooperativa, Elizário Ferreira, hatete, fahe produtu lokal ba komunidade sira atu rekopera komunidade sira nia ekonómia ne'ebé afeita ba surtu Covid-19 iha tinan 2020-2021.

"Objetivu husi programa Cesta Bázika ne'e, kontinuasaun husi programa 2020 ne'ebé atu halo rekoperasaun ba ekonómia iha 2020, ita enfrenta surtu Covid-19 ", nia afirma iha Suku Luka, Postu Administrativu Vikeke vila, Munisípiu Vikeke, segunda (24/10).

Alende ne’e, atu responde mós ba komunidade sira ne'ebé enfrenta inundasaun iha tinan kotuk, liu-liu iha loron 04 fulan-Abríl no iha tinan 2022 mós Timor -Leste hasoru kalamidade boot,  ne'ebé sai problema nasionál.

"Hahú husi Suai mai to'o iha ne'e, dalan sira kotu hotu, tanba udan, mota tun estraga hotu, iha fulan-Maiu ho Juñu ha'u mai iha Vikeke atun vizita Kooperativa, maibé atu liu husi Natarbora dalan kotu, husi Natarbora mai Vikeke dalan kotu no atu ba Same dalan ho ponte sira kotu hotu", nia dehan

Maske hasoru difikuldade, maibé liu de'it semana rua nia laran Ekipa husi Institutu Gestaun Ekipamentu (IGE) halo kedas konektividade hodi hadi'a fali dalan sira ne’ebé kotu.

Tanba ne'e, Programa Cesta Bázika la'ós atu rekopera komunidade nia hahán ba tinan ida nian, maibé responde ba durasaun durante loron ida ka rua depende kada família uma-kain nian.

Minístru Koordenador Assunto Ekonómika, Joaquim Amaral, hatetn, governu hahú distribui Cesta Bázika iha Munisípiu parte leste nian, tanba ne'e husu ba parte hotu kolabora atu ema hotu bele hetan hahán lokál sira.

"Ohin iha parte leste Munisípiu tolu Vikeke, Baukau Lautem, ita hahú iha Vikeke, primeiru hola parte iha suku Luka, ne'ebé iha ne'e mak sei extende halo luan ba iha suku sira seluk to'o hotu, nune'e sei loke tan iha Baukau no mós sei iha Vikeke, iha parte Leste nian, ne'e tulun ida husi governu atu bele motiva ajuda ita nia produtor sira, agrikultór sira no atu ajuda mós ita nia kompaña sira", nia afirma

Tanba, agrikultór no kompaña mak airin ba ekonómia iha Timor-Leste, bainhita produsaun laiha nia implikasaun mak merkadu sei la funsiona no dependensia de’it ba merkadu internasionál.

"Osan oituan ne'ebé ita iha, mezmu simu husi Veteranu ou subsidiu ba inan faluk sira, maibé ita gasta ba sosa ai-han sira mai husi rai li'ur", dehan nia.

Nune'e husu ba autoridade lokal atu koordena ho kompaña fornesedor hotu, atu komunidade sira hotu-hotu hetan produtu lokal.

Kompaña Hezelda Unip. Lda mak sai manán na'in hodi distribui ai-han lokál ba komunidade sira iha Suku Luka ho Suku Karaubalun, ne’ebé ho total populasaun hamutuk rihun 9.

Serimonia lansamentu ba distribuisaun programa Cesta Bázika ne'e, partisipa husi AIFAESA. IP, PDHJ, PNTL Munisípiu Vikeke no populasaun sira. (*)