SEKOOP Elizário Ferreira, hatete, programa Cesta Bázika atu fó kontribuisaun ba inan no aman, Ajente Ekonómiku sira, hodi rekopera ekonomia ne'ebé impede husi Covid-19 inklui hetan dazestre iha tinan 2019 to'o 2022.
"Cesta Bázika ne'e, atu fó fali kontribuisaun oituan ba ita nia komunidade no rekopera Ajente Ekonómiku sira hanesan, loke keos, restaurante no kompaña sira ne’ebé halo negósiu, sira ne'e mak sai autór rekoperasaun iha Timór, atu fó marjen katak, ema sira ne'e tenke rekopera fali, tanba lakon ekonomia família nian," dehan nia iha Suku Caicido, kuarta (26/10).
Nia informa, programa ne'e, atu apoiu hahán ba Timoroan tomak ne'ebé mak hasoru Covid-19 iha tinan 2019 no afeita ba kalamidade iha tinan 2021 to'o 2022, maske munisípiu Baukau la hetan kalamidade, maibé distribuisaun hahán ne'e ba sidadaun hotu iha territóriu nasionál.
"Ita iha fulan-Maiu ho Juñu liu ba, Baukau la kona, udan maibé parte súl, Vikeke ba to'o Suai halo dalan sira kotu hotu, maibé depois rekopera fali no akontese inundasaun ne’e mós estraga hotu komunidade nia natar no to'os" esplika nia.
Tanba ne’e, Governu kria programa lubuk hanesan apoiu osan (US$200.00) ba kada família iha tinan 2020 no to'o agora kontinua la'o, maibé hahú iha fim do ano hanesan prezente natal ba inan no aman sira, fahe produtu lokal ba kada sidadaun iha territóriu Timor laran tomak.
Xefe Suku Tirilolo, Manuel E. Belo, informa, iha tinan 2022, benefisiáriu Cesta Bázika iha Suku Tirilolo hamutuk 11.726.
"Aami simu karta koñesimentu husi kompaña Montes Frere realidade hatudu, benefisiáriu hamutuk 11.726 dadus la han malu, maibé ha'u agradese ba parte SEKOOP ho kompaña husi Munisípiu mai to'o postu", nia agradese.
Diretor Kompaña Montes Frere, Fernando "Berdu'u" Gusmaun mós informa, parte SEKOOP atribui ona konfiansa, tanba ne’e sei fahe hahán lokal ba komunidade Aldeia haat iha Suku Tirilolo.
"Ami iha ne'e, hola sasán sira ne'ebé tuir Governu prepara ona hanesan, fos, batar-hiki no seluk tan", nia dehan.
Tanba ne’e, iha Munisípiu Baucau sei distribui ba Aldeia Kaicido, Parlamentu, Lialailesu, Osoa.
Serimonia lansamentu ne'e, hetan partisipasaun no monitorizasaun husi, reprezentante Ministériu Koordenador Assunto Ekonómika, AIFAESA, PDHJ, no reprezentante Komisaun Anti Korupsaun. (*)
