Sekretária Estadu Kooperativa (SEKOOP), Elizário Ferreira, informa, programa Cesta Bázika iha tinan-2022, Governu apoiu orsamentu tokon US$40 ba SEKOOP hhodi selebra kontratu ho kompaña lokál 79, ne’ebé distribui ai-han ba komunidade iha Munisípiu 8 hanesan, Lautem, Baukau, Vikeke, Manatutu, Aileu, Ainaru, Manufahi, Kovalima inklui Raeoa.
"Fulan ida ne'e aselera para hotu, tanba prosesu sira tekníku ne'e konklui ona eh ezekusaun real atinji ona 93.36 pursentu", dehan nia iha salaun apuramentu Baukau, Kinta (15/12).
Durante distribuisaun ai-han ba komunidade sira iha nivél Suku, ékipa husi SEKOOP kontinua halo akompañamentu atu sidadaun hotu bele hetan no SEKOOP mós involve AIFAESA, CAC inklui PDHJ, tanba tuir lei.
"Primeiru ho CAC atu hatene prosesu ne'e tenke tuir duni lei, ho PDHJ katak, ema hothotu iha direitu, ho AIFAESA atu hatene katak, povu hotu tenke simu ai-han kualidade", nia hatete.
Alende ne’e, SEKOOP mós realiza semináriu ida ba membru koperativa sira iha Munisípiu Baukau, atu sir abele hatene dezafiu no progressu kooperativa iha Timor laran tomak hodi solusiona problema liuhusi Orsamentu Jerál Estadu (OJE) 2023.
"Ohin (15/12) hala'o semináriu ho dirijente kooperativa sira hamutuk ho administrasaun Munisípiu Baukau hodi hato'o progressu no dezafiu ne'ebé kooperativa enfrenta durante periodu ida, eh identifika mós dezafiu ne'ebé Baukau enfrenta, atu buka solusaun ba implementa programa ne'ebé aprova iha orsamentu jerál estadu 2023", dehan SEKOOP, Elizário Ferreira.
Tanba, liu husi dezafiu mak enkoraza movimentu sira hamosu ideia kreativu hodi bele introduz solusaun pozitivu no progresivu atu fo benefísiu ba membru kooperativa hotu iha Timor laran tomak. (*)
