Tuir komunidade iha Taibessi, Justina Martins hatete, insendiu ne’e, akontese beibeik ona iha fatin refere, tanba ne’e nia deskonfia kauza husi liga eletrisidade ho illegal.
"Dalaruma sira ilegál ne'e, ema tau tiha prepagu sira hakarak dada ilegál fali", dehan nia iha fatin akontesimentu insendiu Merkadu Taibessi, tersa (10/01).s
Nia haktuir, fatin komunidade uza hodi fa'an sira nia sasán ne'e, akontese insendiu ne'e ba dala haat ona, tanba ne'e komunidade sira ne'ebé hela besik viziñu lamenta tebes ho atitude refere.
"Fatin ida sira fa'an ba ne'e, akontese dala haat ona, tanba ne'e mak ita la hatene sira sunu saida karik", nia hatete.
Hafoin akontese insendiu, Bombeirus Nasional Timor-Leste to’o kedas iha fatin hodi rega mate ona ahi, maibé la konsege salva komunidade nia sasan balun.
Komunidade sira ne'ebé fa'an Obrolan ne'e mai husi Munisípiu Ermera, Ainaru no Baukau.
Tuir observasaun www.tempotimor.com iha terenu nota katak, akontesimentu insendiu ne'e, kuaze estraga komunidade nia uma no inklui sasan hanesan obrolan ne'ebe komunidade sira fa'an. (*)