“Veikulu hirak ne'e ita atu kompleta tan ba ekipamentu veikulu espesialidade nia ba tinan 2021, agradese tebes tanba veikulu hirak ne'e sei fasilita di'ak liután ita-nia populasaun sira bainhira iha dezastre liuliu insendiu”, dehan Sekretáriu Estadu Protesaun Sivíl (SEPS), Joaquin José Gusmão dos Reis Martins, iha edifísiu SEPS, Kaikoli, segundu (21/02).

Nune'e husu ba uzuáriu sira atu kuidadu di'ak veikulu hirak ne'e uza ho responsabilidede hodi bele ajuda komunidade sira, bainhira mosu insendiu.

“Ida ne'e mai ho responsabilidede ne'ebé mak boot, liliu ba Diresaun Nasionál Bombeiros ho nia membru tomak hodi bele asegura karreta sira ne'e, ho di'ak hodi bele uza ajuda ita-nia komunidade sira bainhira hasoru dezastre ruma”, dehan nia.

Diretór Jerál Administrasaun Finansas Ministeriu Interior, Mariano de Araújo esplika, prosesu ne'e liuhusi Konkursu públiku administrasaun Finansas nomós aprovizionamentu, ikus mai kompaña Silias mak sai vensedór, no konsege hatama duni karreta hirak ne'e tuir prosedimentu legál ne'ebé mak estabelese.

“Tanba ne'e hakarak husu ba uzuáriu sira uza ba no kuidadu didi’ak ba, sasán Estadu nia, maske ita dehan orsamentu Estadu nia maibé uza ho kuidadu atu nune'e bele fasilita apoiu ba ita-nia populasaun sira liliu iha parte insendiu”, afirma nia.

Diretór Kompañia Silias, Matias Araújo Duarte deklara, veikulu hirak ne'e sosa husi Magalan ho kompaña Sentosa, ho tipu karreta Auto Commando (AC), Auto Tanque Pesado (ATP), Fire Rescue (FR), Pronto Socorro Urbano (PSU), Pronto Socorro Medio(PSM) ho totál orsamentu hamutuk 949,888.00. (*)