Kondisaun estrada husi Suku Nahareka ba Postu Administrativu Ossu, pur-volta kilometru-16, ne'ebé iha tempu udan ema ho transporte labele halo movimentu ba mai, tanba kondisaun estrada fó ameasa ba ema nia vida ita tempu udan.

"Dalan ne'e tahu namdoras, difisil asesu ba karreta sira, sé ba mós tenke dolar didi'ak, mais kuidadu, la'e bele so'e ita ba rai naruk, tanba ne'e esforsu ha'u nian, hatutan nafatin preukupasaun povu nian ba Governu sentral, tanba agora Governu sentral nia planu ba estrada rural nian ne'e iha ona", dehan nia iha salaun apuramentu Munisípiu Baukau, Kuarta (01/02).

Administradór Munisípiu Vikeke, iha dever atu luta ba estrada rural sira, liu-liu Suku Nahareka, nune'e bele halo reabilita iha tempu badak.

Tanba, Ministru Obras Púnlikas (MOP) fó ona autorizasaun ba ekipa Munisípal atu rekolla dadus hodi submete ba nasionál atu prosesa ba reabiltasaun lalais iha tempu badak molok hakat eleisaun parlamentares.

"Ba ha'u ne'e asesu estrada ne'e importante lahalimar, ne'ebé ha'u luta nafatin, ne'ebé orsida sira lori tán surat mai ha'u asina lorin ba Nasionál Ministru atu responde", nia hatete

Husu komunidade Suku Nahareka atu kontribiu prosesu servisi ba projeitu sira ne'ebé husi Governu sei implementa iha tempu badak.

Alende ne’e, Administradór Munisípiu Vikeke mós sei implementa projeitu 4 liuhusi Programa Dezenvolvimentu Munisípal Integradu (PDIM) iha tinan 2023.

Tanba, Orsamentu Jerál Estadu (OJE) ba tinan 2023, ne'ebé Governu preve ba Servisu Administrasaun Munisípal Vikeke, hamutuk tokon US$6.9, nune'e jere ba bens servisu Munisípal nian, inklui kapítal dezenvovlimentu.

"Ba infraestrutura nian dadaun, reabilitasaun ba rezidénsia Administradór Munisípiu nian, armazen ba aimoruk nian, ba edisiu eskola ida iha Lakluta, inklui edifisiu Postu Ossu nian, entaun ba tinan ida ne'e projeitu-4", nia informa.

Projeitu-4 ne'ebé atu implementa iha Vikeke ba tinan 2023 nian, kompostu husi projeitu reabilitasaun ida mak hanesan rezidénzia Administradór Munisípiu nian, maibé projeitu 3 seluk hanesan, Postu Administrativu Ossu, armazenamentu ba aimoruk no edifisiu Eskola Ensiñu Báziku Kailake-Babu'u ne'ebé hamutuk sala-3 tama iha lista konstrusaun foun.

Reabilitasaun ba rezidénzia Administradór Munisípiu mak nia orsamentu númeru boot, tanba sei konstrui moru protesaun foun haleu rezidénzia, rabilita fatin jardim no rezidénzia Administradór nian, enkuantu projeitu 3 seluk nia orsamentu minimu, tanba konsidera projeitu ki'ik.

"Projeitu ne'e importante, tanba durante ne'e ba Saúde nian laiha armazen, aimoruk tau iha sira nia kantor de'it, ba Postu Ossu nian prezisa halo para atende ita nia komunidade, ba eskola nian PKRIE halo ona balun, ita halo tán para oituan-oituan eskola sira bele hetan", nia hatete

Prosesu ba konstrusaun no reabilitasaun edifisiu sira iha Munisípiu Vekeke, dadaun iha ona faze tenderizasaun ne'ebé kompaña lokál hamutuk 20 kompete hela, maibé kompaña 4 mak sei sai manan na'in.

Entretantu Munisípiu Vikeke, kompostu husi Postu Administrativu-5, Suku-36, Aldeia-234, ho nia totál Populasaun hamutuk rihun 800-resin. (*)