Enkuantu mákina rua ne'ebé guarda floresta Baukau halo aprensaun, iha Suku Alaua-Kraik, Postu Administrativu Baguia, loron 05 fulan-fevereiru tinan 2023, no Suku Bukoli, Postu Baukau Vila, halo aprensaun, iha loron 31 fulan-janeiru tinan 2023.

"Iha 2023 ne'e hamutuk rua, horseik ami prende ida iha Baguia, no ida iha Bukoli, mákina ne'e agora iha hela edifisiu", dehan Xefe departementu reprezenta teritórial florsta plantas indústria, Munisípiu Baukau,  Pascoal Afonso Belo, iha kna'ar fatin Vila Nova Baukau, Segunda (06/02).

Ai ne'ebé komunidade tesi ho motorserra, iha Suku Alaua-Kraik, Postu Administrativu Baguia, ai matan dukur hun-ida, objetivu atu uza halo konstrusaun ba edifisiu eskola.

Enkauntu ai ne'ebé komunidade tesi iha Suku Bukoli, Postu Baukau Vila, pur-volta hun-5, ne'ebé hanesan ai-kasi, ai-naras, ai-hanek, objetivu atu reativa hikas natar ne'ebé abandona tinan barak ona, maibé asaun ne'ebé komunidade husi Alaua-Kraik no Bukoli halo, la dirizi karta koñesementu ba parte floresta, nune'e tenke halo aprensaun ba motorserra refere.

"Loos presiza duni, mais tenke aprezenta pedidu, mais ba tesi de'it ami la autoriza, ne'e ilegál, estadu selu ami atu halo intervensaun", nia afirma

Motorserra ne'ebé gurda floresta halo aprensaun, dadaun iha ona edifisiu servisu Munisípal hodi submete ba prosesu investigasaun.

Alende mós nia esplika liután, wainhira komunidade nafatin tesi ai no sunu rai arbiru, sei fó impaktu ba bee matan maran, rai monu, udan been menus, inklui halo klima manas liután.

Tanba ne'e, Governu kria dekretu lei Nu.14/2017, ne’ebé ko'alia kona-ba rezime jerál atu prevene tesi ai no sunu rai arbiru, inklina tán regulamentu Untaet Nu.17 hodi haforsa liután, bandu ema hotu atu tesi ai no sunu rai arbiru, maibé konunidade laiha konsiensia nafatin sunu rai no tesi ai arbiru.

Husu komunidade atu tesi ai-hun ruma uza ba konstrusaun uma, no tesi ai-hun boot sira iha natar no to'os laran, tenke koopera ho servisu floresta, nune'e halo identifikasaun ba fatin, molok tesi ai.

"Para ita haree, besik bee matan karik lalika, tanba impaktu bee matan bele maran", nia dehan

Entertantu guarda floresta iha Munísipiu Baukau hamutuk na'in-18, ne'ebé destaka ona ba postu Adminisitrativu Baukau Vila, Baguia, Laga, Kelikai, Venilale no Vemase atu kontrolu ema tesi ai no sunu rai arbiru. (*)