Iha tinan 2022 ADBN mós apoiu ona ekipamentu sira ba komunidade mineiru iha suku Bebonuk no Manleuana, nune’e atividade distribuisaun ekipamentu ne'e hanesan kontinuasaun.

"Atividade ohin ne'e kontinua de'it atividade tinan kotuk nian ne'ebé ita konsege fahe ona ekipamentu sira ba benefisáriu hamutuk na'in 54 hosi Suku rua Bebonuk ho Manleuana no ohin ita fahe tan ba benefisáriu hamutuk na'in 15 hosi área mota Komoro de'it, tuir mai sei fahe mós ba ema na'in 35 tan hosi área Bebonuk no Madohi ninian, entaun benefisiáriu sira ne'ebé ami alista ona sira nia naran, ami esforsu atu semana ida ne'e nia laran sira bele simu hotu ona sasan”, dehan Diretór Ezekutivu ADBN, Noel Soares Pinto, segunda (06/02).

Diretór Ezekutivu ADBN mós husu ba benefisiáriu sira atu bele uza ekipamentu sira ne'e ho kuidadu, nune'e bele uza ba tempu naruk.

"Ba inan-aman sira ne'ebé ohin simu ona ekipamentu sira ne'e, ha'u husu atu uza sasan sira ne'e ho kuidadu, nune'e bele ajuda imi nia servisu lor-loron iha mota laran ba tempu naruk nian no husu atu labele fa’an tutan fali sasan sira ne'e ba ema seluk, ne'e proividu", nia husu

Enkoraja mós komunidade sira ne'ebé seidauk simu iha etapa ida ne'e atu labele laran susar, tanba sei iha oportunidade etapa tuir mai no fiar katak komunidade mineiru iha área tarjetu sira sei hetan hotu.

Reprezentante benefisiáriu, Pedro Pereira Maria sente kontente ho apóiu ne’e, no promete sei uza ekipamentu sira ne'e iha nia servisu lor-loron.

"Ami sente kontente loos bainhira hetan apóiu sira ne'e, tanba ne'e ha'u lori maluk pinerador sira nia naran hakarak hato'o obrigado wai'n ba Governu no mós ekipa ADBN ne'ebé mak durante ne'e halo esforsu tomak buka dalan hodi fo apóiu ami, no hakarak rekomenda ba Governu atu kontinua fó apóiu ekipamentu sira ne'e, tanba ami nia maluk sira ne'ebé lor-loron pineira rai-henek hamutuk barak mak seidauk hetan", nia rekomenda.

Tuir lista, total benefisiáriu ne'ebé atu hetan apoiu ekipamentu hosi ADBN hamutuk na'in 104, maibé balun simu ona iha tinan 2022 no balun ne’ebé seidauk sei simu kompleta iha tinan ida ne’e.

ADBN kontinua esforsu atu buka dalan ko'alia ho emprezáriu, Governu nomos ajénsia sira hodi fó apóiu ba sira nian programa servisu ba komunidade mineiru sira, tanba tuir planu tentativa, tinan ne'e ADBN sei organiza atividade adisional sira hanesan medical chek-up regularmente ba komunidade mineiru sira, atividade sensibilizaun ba hadomi meiu ambiente nomos protesaun fasilidade públiku sira.

Enkuantu sasan sira ne'ebé ekipa ADBN distribui ba komunidade mineiru sira mak hanesan karosa, rede númeru 1/2, ai-suak besi, botas, maskra, luvas, rompi, ouklu no kapasete salva ulun.

Entretantu orsamentu ne'ebé aloka ba sosa ekipamentu sira ne'e mai hosi Servisu Apóiu Sosiedade Sivil no Auditória Sosial (SASCAS) liuhusi subensaun públika ho total orsamentu rihun US$15. (*)