Tuir informasaun ne’ebé www.tempotimor.com,  asesu iha loron tersa (04/04) katak, ezekusaun aas liu mak iha Administrasaun Sentrál ne’ebé mak ezekuta ona millaun $203,8 husi orsamentu alokadu billaun $1,8. Enkuantu Autoridade RAEOA - ZEESM ezekuta ona milluan $3,5 husi orsamentu alokadu milluan $120.

Ezekusaun reál OJE 2023 ba Administrasaun Sentrál em termos nominál atinje ona milluan $203,8 husi totál orsamentu alokadu billaun $1,8.

Ezekusaun aas liu mak iha Liñas Ministeriais ne’ebé ezekuta ona milluan $151,4 husi orsamentu alokadu billaun $1,2. Tuir kedan ho Ajénsia Autónomas ho nia ezekusaun atinje ona milluan $26,1 husi orsamentu alokadu milluan $218,3. Autoridade Municipais ezekuta ona milluan $21,6 husi orsamentu alokadu milluan $81,3. Fundu Infraestrutura (FI) ezekuta ona milluan $2,4 husi orsamentu alokadu milluan $202,7. Enkuantu Fundu Dezenvolvimentu Kapitál Umanu (FDCH, sigla Portugés) ezekuta ona milluan $1,6 husi orsamentu alokadu $17,8 milluan.

Iha primeiru trimestre 2023, Ministériu Finansas halo ona levantamentu osan husi Fundu Minarai ho montante milluan $300 ka 22% husi totál orsamentu billaun $1,346 ne’ebé mak Parlamentu Nasionál aprova ona liuhusi Lei OJE 2023.

Iha tinan 2021, ezekusaun reál OJE iha primeiru trimestre em termos nominál atinje milluan $316. To’o iha fulan-dezembru 2021, Governu konsege ezekuta billaun $1,442. Valór nominál ida-ne’e mak segundu maiór desde tinan 2016.

Iha tinan 2022, ezekusaun reál OJE iha primeiru trimestre em termos nominál ezekuta milluan $160,8. To'o iha 31 dezembru 2022, ezekusaun reál em termos nominál atinje billaun $1,743. Valór nominál ida-ne’e mak aas liu iha istória Timor-Leste no konsege ultrapassa ezekusaun reál OJE 2016 iha ne’ebé Governu konsege ezekuta billaun $1,630.

Ho ezekusaun reál OJE 2022 ne’ebé fenomenál-sa’e 7% kompara ho ezekusaun reál OJE 2016-hatudu katak kapasidade ezekusaun orsamentál iha liñas ministeriál mós aumenta. Atu mantein ritmu no kapasidade ezekusaun ida-ne’e, Governu komprometidu atu halo investimentu kontínuu iha área rekursus umanu, iha sistemas inklui iha enkuadramentu legál sira. (*)