Benefisiáriu ne'ebé simu ekipamentu ne'e, mai hosi área Comoro, Madohi no Bebonuk, ne'ebé lor-loron halo serbisu piñera rai-henek iha mota laran.
"Benefisiáriu sira ne'ebé ohin ita konsege distribui ekipamentu ba, maioria hosi área Bebonuk nia hamutuk 10, Madohi na'in 4 no 1 hosi Comoro, entaun total benefisiáriu ne'ebé ohin simu ekipamentu ne'e hamutuk 15", dehan Vice Diretór ADBN, Jerónimos Fernandes, tersa (05/23).
Hafoin distribui ekipamentu, ekipa ADBN mós apela ba komunidade piñeirus sira atu labele piñeira rai-henek besik área protezidu sira.
"Ohin ita boot sira simu ona ekipamentu sira ne'e, ami husu atu utiliza ho di'ak no ami nia lia menon ba imi mak ne'e, labele piñeira rai-henek besik bronzon no ponte sira hodi estraga fali fasilidade públiku, ne'e área protezidu ne'ebé Governu bandu atu labele piñeira iha área sira ne'e", nia husu.
ADBN mós enkoraja komunidade piñeirus sira atu kontinua hamutuk ho ekipa ADBN hodi halo limpeza regular iha mota laran.
"Inan-aman, tiu-tia sira, agora ne'e tempu udan, nune'e lixu iha mota laran sei aumenta makaas, tanba ne'e husu ita hotu nia kolaborasaun di'ak atu ba oin halo netik limpeza hamutuk, pelumenus fulan ida dala ida, nune'e ita bele asegura ita nian ambiente moos. Selae lixu sira iha mota laran ba hotu iha tasi laran, entaun bele estraga hotu ita nia biodiversidade tasi nian", nia dehan
Benefisiáriu Mateus Coelho, sente kontente ho ekipamentu ne'ebé simu no sujere atu Governu ho ADBN kontinua fó apoiu ba sira iha futuru.
"Ha'u sente kontente, tanba ohin bele hetan apoiu ekipamentu ida ne'e, ha'u agradese tebes ba Governu, maibé ha'u mós sujere ba Governu atu kontinua fó ajuda ami, tanba ami nia maluk sira ne'ebé ami piñeira hamutuk ne'e barak mak seidauk simu", nia espresa.
Enkuantu tipu ekipamentu sira ne'ebé ADBN distribui mak hanesan, karosa, rede númeru 1 no 2, aisuak besi, kanuru piñeira rai-henek kiik-boot, kapasete salva ulun, botas, rompi no maskra.
Hosi tinan 2022 mai to'o 2023 agora ADBN konsege distribui ona ekipamentu piñeira rai-henek no material salva an nian ba komunidade piñeirus sira hamutuk 144.
Orsamentu ne'ebé aloka ba sosa ekipamentu no material protesaun nian, hetan apoio hosi Serviços de Apóio á Sociedade Civil e Auditoria Social (SASCAS-VPM) liuhusi suvensaun públika hamutuk rihun USD$10. (*)
