Objetivu husi asina akordu ho STP Bali, hodi bele haruka joven timoroan nain 10 ba tuir formasaun iha área ospitalidade,durante fulan 6. Nune’e, SEFOPE mós asina akordu ho hotel Novu Turismu oinsá formandu hirak ne’e fila mai sira bele emprega kedan.
Julião hatete, SEFOPE sei servisu hamutuk ho STP Bali para oinsá maka atu bele fó formasaun ba timoroan sira.
“Prosesu ne’e, sei loke vaga ba timoroan hotu, hodi aplika no sei halo selesaun husi ekipa Novu Turismu, STP Bali no mós FDCH. Tanba sei presiza kriteria balun ne’ebé presiza prienxe. Tuir planu, atividade ne'e sei realiza iha Novembru nia laran,” SEFOPE hatete.
SEFOPE mós husu ba joven sira, atu kuidadu ho sira-nia saúde, tenki aprende lian Ingles, labele halo violénsia no hasees-an husi risku hotu.