"Bieky Sahe nia edifísiu hahú harii ona, tan ne'e, imi nia kooperativa ne'e labele mate, maibé tenke hamoris beibeik kooperativa ne'e ba oin" Dehan SEKoop, wainhira halo lansamentu fatuk dahuluk, ba edifísiu Kooperativa Bieky Sahe, iha ostico Baucau, kinta (08/10).
Nia hatutan, sede ne'e fatin ba funsionamentu kooperativa, tanbá ne'e, labele akontese, istória malu ou hirus malu, hodi fahe tiha osan ne'e ba malu.
"Labele halo tiha sede, husik bibi ho fahi mak toba iha laran, maibé halo sede ba ema, atu servisu" dehan Sekretáriu Estadu.
Governante ne'e, apela ba membru sira, katak sede ne'ebé atu harii ne'e, ema mak atu hola parte, maski ema foin mak nain 83 de'it, maibé tenke aumenta tan membru ba nain 150, bainhira tinan ida ne'e remata, ne'e metas ne'ebé membru kooperativa sira tenke atinji.
"Tanbá kooperativa ninia baze, la'ós mak osan, maibé baze mak ema, entaun presiza aumenta tan ema halo barak liu tan" akresenta SEKoop.
Iha fatin hanesan, Prezidente Kooperativa Bieky Sahe, Afonso da Costa Freita sente orgullu tebes, ho SEKoop nia prezensa iha lansamentu ne'e no diretamente lansa ona, fatuk dahuluk, ba harii edifísiu Kooperativa Bieky Sahe nian.
"Ohin SEKoop to'o iha ne'e, ha'u nu'udar Prezidente Kooperativa Bieky Sahe, orgullu teb-tebes, tanbá nia mai lansa ona primeira pedra (fatuk dahuluk), iha ami-nia suku, atu harii ami-nia edifísiu ba Kooperativa Bieky Sahe nian, atu nune'e ami mos iha edifísiu rasik" Dehan Prezidente Kooperativa Bieky Sahe, iha Ostico, kinta (08/10).
Nia hatutan, wainhira edifísiu kooperativa ne'e, di'ak tiha, sei iha kooperativa nia laran ne'e, foka liu ba sistema kréditu nian, hodi fó kréditu ba sosiedade sira.
"Ami agora dadaun, ami-nia membru kooperativa hamutuk nain 83, feto hamutuk nain 38, mane nain 45, maibé espera katak, ema sei aumenta tan, Wainhira edifísiu ne'e di'ak no bele uza ona" akresenta nia.
Prezidente Kooperativa mos hatutan, planu ba oin mak, wainhira sira iha ona sede, mak sira sei kobre tan to'o iha suku viziñu sira, hodi fó informasaun ba sira, atu nune'e, sira bele tama mos iha Kooperativa Bieky Sahe ne'e, liga liu ba sistema kréditu.
Edifisiu Kooperativa Bieky sahe, ne'ebé dadaun ne'e, atu harii ho nia medida 6×15. Nune'e mos, fundus ne'ebé sei gasta ba konstrusaun edifísiu ne'e, hamutuk $. 1.222,05. Enkuantu
osan husi Kooperativa nian, hahú husi tinan 2016 to'o fulan Setembru tinan 2020 ne'e, hamutuk $. 26.222,085
Kooperativa Bieky Sahe ne'e, harii iha fulan outubro tinan 2016, antes ne'e tau naran Hahaek, maibé ohin loron troka fali ba Bieky Sahe, tanbá Segundu Prezidente Nicolau Lobato ho Komisáriu Fretilin Vicente Reis Sahe, sai mos fundadór ba kooperativa ne'e.
Kooperativa iha misaun rua mak, eduka povu ba analfabetizasaun no konsentra povu atu hala'o edukasaun, ba sósiu-ekonómiku no asegura rezisténsia TL nian.
SEKoop nia planu ba futuru mak, sei hala'o edukasaun, formasaun no informasaun ba kooperativa sira, mobiliza joven sira fila ba kampu kapitalizasaun, ba kooperativa sira, atu asegura liña de kréditu, iha jurus ne'ebé di'ak ba povu sira.
