Vise Prezidente Camara Comersiu Industria Timor-Leste (CCI-TL), João Alves hatete, atu hasa’e kresimentu ekonomiku no hamenus sasan importasaun, importante liu mak setor privadu iha TL tenke asesu ba kreditu.
"Objetivu atu bele halo industria la'o ba oin tenke iha sistema kreditu ba dezenvolve kualkér industria ida," dehan João iha nia iha knar fatin, Akait, Kinta (15/10).
Tuir nia, kreditu ne’ebé daudauk ne’e governu oferese sei menus ba industria sira ne'ebé atu dezenvolve ekonomia.
"Agora dadauk governu tau de'it ba sosiál sira, mais se di’ak liu kreditu ne'ebé iha bele fasilita seitor privadu atu investe tan iha seitor produtivu, ida ne'e mak importante," dehan nia.
Tuir nia, daudauk ne’e problema boot mak importasaun sei boot no sasan importasaun mós ho folin ne’ebé baratu, nune’e defisil ba emprezariu Timor-oan atu bele kompete.
"Ita haree importasaun manu ne'e ho presu ne'ebé ki'ik, manu sira ne'ebé kolega sira fa'an ne'e presu sei $5 dolares, entaun ida ne'e mak sai dezafius ba Kamara Industria atu bele tau ema barak iha negósiu hanesan ne'e par bele iha kompetisaun lokal, depois bele redus presu no manan númeru husi volume par depois kompete ho importasaunm" dehan nia.