Tuir Ministru Agrikultura no Peskas (MAP) Pedro dos Reis katak, orsamentu 2021 ne'ebé MAP hetan, sei prioritiza ba hasa'e produsaun ai-han no hadi'a irigiasaun sira ne'ebé kontinua aat.
"Tenke hasa'e produsaun, agora atu hadi'a produsaun, tenke hadi'a irigasaun, sé irigasaun ne'e di'ak bee la to'o, ita tenke halo para bee ne'e iha," hatete Padro iha PN, Tersa (20/10).
Governante ne'e afirma, antes ne'e MAP propoin ho montante orsamentu hamutuk tokon $19, maibé MAP mós propoin tan proposta adisionál ho montante tokon $10, nune'e hamutuk tokon $29 inklui orsamentu ba irigasaun nian hamutuk tokon $3 ne'ebé tama husi Komite Revizaun Orsamentu Polítika (KROP) hodi aprova ona tokon $32.
"Ami sei halo tan proposta adisionál ida hodi lori mai deputadu sira PN, para sira bele tau atensaun prioridade ba ida ne'e, tenke hadi'a irigasaun, tanba iha sistema irigasaun sira ne'e, barak mak aat hafoin mosu inundasaun iha tempu balun ba kotuk," nia tenik.
Nia hatutan, durante monitorizasaun husi ekipa MAP nian, relata katak irigasaun hamutuk 38 iha territóriu TL mak kondisaun aat. "Sé ida ne'e mak la'o ona, ha'u fiar katak seguransa ai-han iha ita-nia rai laran ita bele responde," hatete nia.(*)