SEP Elídio de Araújo hateten, husi totál peskadór hirak ne'e, fahe ba grupu hamutuk 1.063 ne'ebé namkari iha Timor laran.
"Tanba ne'e mak Bero sira ne'ebé mak iha ne'e sei oitoan, menus liu, ita luta nafatin, Bero ne'e kontinuasaun husi Ministru anteriór iha 2019 nian hamutuk unidade 38", SEP hateten lia hirak ne’e hafoin distribui Bero no Rede ba peskadór sira iha sionál Lesidere, Sesta (18/12).
Nia subliña, Bero unidade 38 ne'e, distribui ba Munisipiu Lautem ne'ebé hetan 3, Baukau hetan 6, Manatutu hetan ida, Manufahe 8, Ainaru iha 2, Dili iha 10, Likisa iha ida, Bobonaru iha 7, no Vikeke ho Kovalima mak seidauk hetan.
"Ita luta nafatin, la'ós ida ne'e de'it, iha planu orsamentu 2021, hanesan SEP ita propoin tan Bero hamutuk 110 no pasa iha Parlamentu", nia tenik.
Nune'e, planu Sekretariu Estadu Peska nian sei distribui Bero 110 ne'e ba kada munisipiu sei hetan tan 10.
"La inklui Ermera ho Aileu, tanba sira laiha tasi, maibe ita promove nafatin ikan atu atinji saida! metas governu nian hateten katak, 2023 kada ema konsume ikan kilograma 10, ne'e mak ita nia luta", Nia salienta.
Tan ne'e, atu atinji metas ne'e, tenke kompleta ho fasilidade ka ekipamentus, eh ida ne'e mak daudaun Sekretariu Estadu Peska halo hela ba komunidade peska sira iha Timor laran tomak.
Entertantu, ohin Sekretariu Estadu Peska distribui Bero 10 no Rede ikan 10 ba komunidade peskadór sira. (*)