“Mensajen ne'ebé husik hela ba tomada-de-posse ba kooperativa ida nee nian maka asegura unidade iha kooperativa nia laran, jere kooperativa ho espiritu no prinsípiu kooperativa nian hodi asegura sustentabilidade no asegura estabilidade finanseira”, SEKoop Elizário Ferreira hateten ba jornalísta sira iha suku Dato, postu administrativu Likisa Villa, munisípiu Likisa, Tersa (22/12).

Nia dehan, bainhira dirijente ho membru sira iha Kooperativa Paulo de Jesus (KPJ) mantein unidade no jere kooperativa ho diak, bele asegura estabilidade ekonómiku iha vida família, sosiedade no nasaun.

Iha fatin hanesan, konselleiru KPJ, Filomeno da Paixão de Jesus, husu ba membru no dirijente sira atu haree kooperativa hanesan sistema ida abranjente liu, preokupa liu ho ema seluk nia susar no dala-ruma bele lori futuru ba sosiedade ida ne’ebé jeneroza komprensiva.

“Hanoin malu liu iha pelu-menus no fundu sentimentu de amor, karidade, komprensaun entre membru sira. Ida ne'e maka maizumenus vizaun husi fundadór sira atu funda kooperativa ida ne'e. Klaru katak primeiru ita tenke iha konseitu ida ne'ebé jenuizu, puru, klaru ho ajuda husi sekretáriu estadu kooperativa ho nia meza iha staff sira konsege infunde ba ita hanoin saida maka konseitu kooperativa ida”, nia dehan.

Tuir nia, kooperativa hanesan sistema ida entre kapitalízmu ho sosialízmu, maibe iha sistema rua ne'e, tenke enkaixa mós sistema kooperativa iha nia laran, nune'e bele lori futuru diak ba nia membru sira hotu, futuru ida ne'ebé integrante no solidáriu liu.

“Tanba ne'e maka ha'u bolu atensaun ba iha membru sira, ita ohin halo juramentu ida ke sériu iha Maromak nia prezensa tanba ita apela ba maromak. Estadu nia prezensa tanba sekretariu iha ne’e no labele haluha, liu-liu ita ne'ebé iha uma-lisan ne'e iha avo sira mós rona maka ne’e. Labele halimar ho juramentu, komprimísiu, labele halimar ho komitmentu”, nia fó hanoin.

Konselleiru ne'e mós husu ba membru sira ne'ebé simu ona posse, tenke konitinua ho koopetiva ne'e la'o ba oin, hodi belel muda vída, tanba maske iha tempu sira ba kotuk, ema la tau importásia iha ida-idak nuia moris, halo tuir hakarak no dezliga malu.

“Kuandu muda ona, ita hakarak buat ida sosiedada mais solidária, ema seluk nia susar mós ita tenke sente, ita labele haree de'it ba ita nia-aan, tanba ida ne'e maka ita halo kooperativa ne'e. Ida ne'e esforsu ne'ebé señor sekretáriu halo másimu”, dehan nia.(*)