Ministru hato'o deklarasaun ne'e hodi hatán ba preokupasaun deputada bankada CNRT Carmelita Caetano Monis relasiona ho pagamentu saláriu désimu terseiru ba funsionáriu públiku ne'ebé to'o agora seidauk realiza.

Nia haktuir, desizaun governu iha tinan kotuk suspende la halo pagamentu désimu terseiru ba funaionariu husi ministeriu hotu, tanba osan la to'o.

Kona-ba informasaun ida ne'e, nia haktuir, informasaun ne'e kuaze funsionáriu sira iha ministeriu tomak, rona no hatene hotu, katak bainhira ministeriu ida ne'ebé mak nia orsamentu ba salariu desimu terseiru la prevé iha orsamentu jerál estadu (OJE) 2020, ida ne'e governu sei selu iha fulan janeiru 2021.

"Kona-ba désimu terseiru, to'o oras ne'e ha’u hanoin, iha loron hirak liu bá, iha plenária ne'e duni havu halo esklaresimentu katak, désimu terseiru hatete kedas katak, bainhira ministériu ne'ebé mak nia osan la prevé iha 2020 ba dèsimu terseiru, ninia orsamentu ne'e sei selu iha janeiru 2021," nia dehan iha plenaria PN, Segunda (11/1).

Nia deklara, hanesan ejizensia deputadu ne'e klaru katak, deputadu sira rona deit husi keixa balun husi funsionariu sira, maibe kestaun ne'e rasik ministériu ida-idak hatene hotu ona, sira mós informa antes tiha ona, ba sira nia funsionáriu sira, atu hatete katak osan la to'o osan ne'e sei selu iha fulan janeiru, hotu-hotu iha informasaun ida ne'e.

"tanba ne'e saida mak deputadu sira foti, sim, tanba rona keixa husi funsionáriu sira, maibe funsionariu sira labele haluha katak sira mós hatene ona situasaun sira nian rasik," nia dehan.

Aleinde problema pagamentu salariu desimu terseiu ne'e, nia parte mós sita kona-ba dekretu lei ne'ebe sei fasilita asesor no tékniku aira atu asesu ba désimu terseiru nian ne'e.

Kona-bá salariu désimu terseiru ba asesor sira ne'e, nia deklara, parte governu rekoiñese ida ne'e, tanba dekretu lei mak hatete duni, no governu liu husi Ministériu asuntu parlamentar no komunikasaun sosiál esplika tiha ona iha tinan kotuk, katak lei ne'e mós prevé ba asesór sira iha diretu atu hetan mós désimu terseiru maibé la'os hanesan salariu ne'ebé nia simu fulan-fulan.

"Nia hetan de'it salariu désimu terseiru, tuir ninia level ne'e katak nia level ne'e hanesan diretór jerál de'it, ne'ebé la liu, ba sira ne'ebé maka simu salariu 5 mil mai kraik," nia hakotu. (*)