Ne'e duni, Sara Lobo mos fiar katak ohin funsionáriu hotu bele hetan ona sira-nia saláriu tanba prosesu ba pagamentu ne'e remata ona iha horisehik tersa (2/2).

"Maibé ha'u fiar katak to'o ohin ne'e ema hotu simu, saláriu hotu ona, porque últimu ne'ebé mak simu horisehik, la'ós de'it atrazu husi finansa maibé banku mós iha ninia problema internál, dalaruma kontribui loron ida ou rua, entaun halo konke hanesan atrazu loos tiha ona, mas ha'u fiar katak hotu-hotu simu ona nia saláriu,"dehan nia iha Parlamentu Nasionál, kuarta (3/2).

Tuir nia, hahú husi fulan-dezembru to'o janeiru, pagamentu salariu hotu-hotu atrazu, inklui saláriu désimu terseiru.

Problema hirak ne'e, nia haktuir situasaun ne'ebé governu enfrenta ne'e mak situasun foin lalais iha fulan taka tinan 2020 no tama fali fulan janeiru, entaun iha dezembru taka tinan maka orsamentu 2020 governu ezukuta de'it iha fulan tolu, entaun tempu badak teb-tebes, no programa lubuk ida hanesan selu désimu terseiru.

"Entaun iha situasun ne'e Ministériu Finansa kuaze la deskansa, depois taka 31 dezembru hahú kedas ona orsamentu foun," dehan nia.

Nia konsidera situasun kona-ba saláriu atrazu ne'e, bainbain tama tinan foun sempre akontese hanesan ne'e.

Nia fó ezemplu hanesan iha orsamentu foun tinan 2021 ho montante sa'e ba biliaun $1.8, maibé nia programa, estrutura orsamentu muda hosi kategoria ba kada programa, signifika atividade no programa muda inklui mos instituisaun no diresaun foun, entaun ida ne'e presiza atualiza hotu iha sistema payroll nian no ida-ne'e presiza ema servisu lori tempu tanba ne'e atrazu.

"Atrazu nia sentidu mak data ne'ebe fula-fulan biasanya, selu iha mudansa uituan, ne'e tanba ministériu finansa atualiza dadus hotu-hotu ne'ebe mak aprova iha parlamentu,"dehan nia.(*)