Tanba atividade formasaun ida ne'e, hodi korresponde programa SEKoop nian ne'ebé planeadu atu lori joven sira fila ba kampu hodi halo atividade kooperativa.

 “Sim, ida ne'e tama iha terseiru programa kooperativa nian, SEKoop nian ne'ebé katak, lori joven fila ba kampu. Ema bolu dehan, joven kooperativa ba joven”, dehan Sekretáriu Estadu Kooperativa (SEKoop), Elizário Ferreira, hafoin abertura formasaun iha salaun Igreja Katedral, Vilaverde, tersa (15/06).

Husi formasaun ne'e, atu eduka juventude sira sai organizadór permanente iha nível baze, ema sai mobilizadór no sai mós nu’uudar motivadór permanente iha baze.

“Primeiru, organizadór ne'e katak saida. Iha fatin ne'ebé ema dezorganizadu, la koñese kooperativa, sira-nia prezensa atu organiza ema, e eduka sira atu komprende kooperativa, e mobiliza ema, populasaun sira atu hola parte iha kooperativa. Sira ne'ebé agrikultór, organiza sira ba sira-nia kampu-de-traballu, mak natar ho toos”, esplika nia.

Komunidade sira ne'ebé hanesan peskadór, juventide sira bele organiza ba tasi, atu halo peska, nomós hirak neebé komprende oituan kona-ba negósiu, bele integra-an iha negósiu ho agronegósiu.

“Sira ne'ebé hatene hakiak animál, organiza sira atu hatene hakiak animál sira, e motiva sira. Motiva ne'e katak saida, hanesan mós programa inovasaun ida, oinsá mak bele motiva populasaun sira, atu hatene produz ho valór aumentu. Sé ai-farina daan hela de'it, motiva sira bele halo kripik nakfilak ai-farina ne'e ba oioin, labele loron kalan mak daan hela de'it”, haktenik nia.

Bainhira formasaun remata, juventude sira sei destaka ba kada postu administrativu hodi fó koñese merkadu ba komunidade sira, hatene produz hodi kontribui ba dezenvolvimentu ekonómia família ho sosiedade nian.

“Ida ne'e mak objetivu prinsipál husi formasaun husi loron ohin nian, to'o loron 30, no ida ne'e sira sei aprende buat lubuk ida, husi parte ekonómia, agrikultura, kooperativa rasik, sei tau iha sira-nia ulun atu sira bele sai organizadór, mobilizadór, no motivadór ida ne'ebé iha kualidade hodi servi ita-nia nasaun”, hateten nia.

Kona-ba akompañamentu SEKoop iha asaun tolu mak sei define mak iha facebook grup, whatsapp grup, e-mail ba hothotu, kuartu sei iha webiste. Tanba liuhusi ne'e, atubele asegura komunikasaun ida di'ak, entre sira ne'ebé iha munisípiu, postu to'o kooperativa sira ne'ebé iha suku.

Entretantu, formasaun ne'e sei hala'o durante fulan ida, hahú iha loron 15 fulan-juñu tinan 2021 sei termin iha loron 15 fulan-jullu. (*)