“Fós hamutuk 253 kompostu husi fós, inklui mós supermie ho nesesidade bázika sira ne'e. Uma-kain ida sei hetan fós saka ida, ho supermie, mina inklui fasilidade seluk tan. Apoiu ida ne'e la'ós haree ba folin, maibé fós saka ida, sabaun, mina, supermie, rinso sira ne'e hotu. Ida ne'e fó, laos atu sura folin”, hatete Sekretáriu Estadu Kooperativa (SEKoop), Elizário Ferreira, iha sede Aldeia 30 de Agosto, Suku Komoro, Postu Administrativu Dom Aleixo, sesta (24/06).

Apoiu hirak ne'e hanesan parte ida atu tulun família sira-nia nesesidade ba tempu balu atu responde direta ba problema ne'ebé hasoru durante inundasaun.

Maibé husu ba komunidade sira ne'ebé uma hetan estragu husi mota no inunasaun, sujere atu buka fatin ne'ebé seguru hodi bele hari'i filafalu uma foun, hodi nune'e bele hasees-an husi risku dezastre nasturál.

“Sira ne'ebé hela iha fatin risku, tenke koopera oinsá mak aban-bainrua labele hela nafatin iha risku, e koopera ho estadu atubele hetan fatin ne'ebé di'ak, para labele hetan bebeik impaktu husi inundasaun tinatinan”, informa nia.

Entretantu Xefe Aldeia 30 de Agosto, António da Costa, lori vítima sira-nia naran agradese ba governu, liliu SEKoop, tanba bele rona sira nia susar ho terus ne'ebé hasoru durante inundasaun.

“Ha'u ho komunidade sira hato'o agradese wa'in ba nai sekretáriu estadu ho nia komitiva, tanba ohin hakat mai ami nia fatin, hodi lori apoiu ai-hán mai ami-nia komunidade sira ne'ebé nia uma ho sasán sira uma laran, hetan estragu”, agradese nia.

Husi vítima hamutuk 253 ne'e, iha uma kain 17 mak uma labele salva, tanba hetan estragu husi mota, no sasán uma-laran bee lori hotu.

Totál populasaun iha aldeia 30 de Agosto iha uma-kain kuaze rihun-ida-resin (1.000-resin). (*)