"Ita-nia sistema ai-hán, hahú husi produsaun, ita-nia produsaun seidauk to'o, ita sei iha problema barak. Ko’alia kona-ba ninia ambiente produsaun. Ita-nia rekursu naturál, ita-nia rekursu finanseiru para investimentu iha área agrikultura, ita sei iha problema lubuk ida ne'ebé sei enfrenta”, dehan Filipe hafoin abertura diálogu iha Otél City 8, tersa (13/07).

Iha sistema distribuisan nian, ema atu hetan asesu ba buat ruma ho lais, sei iha problema barak, no la'ós de'it ligasaun entre estrada, maibé kapasidade atu kompra mós sei iha problemas barak, nune'e presiza diskute klean liután.

"Utilizasaun. Ita sei iha hahán ne'ebé ita estraga de'it. Hahán ne'ebé ita hahú husi kolleta to'o iha meza leten, ne'ebé gasta de'it, estraga de'it. Iha mundu, tuir relatóriu ne'ebé ami lee, dehan katak besik 1 millaun tonelada hahán, soe de'it. Iha Timor-Leste, ha'u estuda katak, informasaun dehan iha 37 pursentu husi hahán ne'ebé ita produz no ita hán iha meza leten ne'e, sei ba iha buat bolu dehan ‘food waist’”, hatete nia.

Tanba ne'e, parte hotu presiza halo diskusaun, oinsá atubele reduz buat ne'ebé gasta de'it, hodi bele hasa'e liután produsaun, no konserva liután hahán, atubele sai husi situasaun inseguransa hamlaha.

"Ita uluk ne'e relata hamlaha, agora ne'e ita ko’alia kona-ba inseguransa ai-hán. Tuir relatóriu ne'ebé ita iha, imi hotu asesu, ita sei iha 36 pursentu populasaun mak hela iha inseguransa aihán gráve. Entaun, iha de'it 25 pursentu mak ai-hán ne'e seguru, e sira barak liu hela iha Dili. Entaun, ida ne'e duni mak sai hanesan problemas ne'ebé ita presiza diskute iha diálogu ida ne'e", afirma nia. (*)