Ho mehi ne’ebé iha obriga joven ida ne’e hakat sai husi hela fatin ho karosa, maske rai sei malirin, ema balun sei hafalun-an ho mehi furak, maibé Cornelio tenke hakat ho pasta iha nia kabás dudu sai nia karosa ne'ebé nakonu ho nu'u, hakat sai husi uma ba buka moris iha dalan ninin hanesan negosiante sira seluk atubele sustenta nesesidade loroloron hodi kontinua nia estudu.
Negosiante Cornelio nu'udar estudante hela iha Suku Komoro, Postu Administrativu Dom Aleixo, Munisípiu Díli, durante ne’e hela ho nia tiu ne’ebé moris labele suporta nia atu kontinua estudu hodi realiza mehi, tanba nia estudu iha Universidade da Paz (UNPAZ) semestre III, Departamentu Tékniku Sivíl, esforsu-an fa’an nu'u, sai alternativa ida hodi hamenus susar ne'ebé nia hasoru iha situasaun pandemia Covid-19 nia laran ne'e.
Bainhira Loron matan hatudu nia naroman husi foho Kamea tutun, Cornelio prontu ona iha Hali okos área Lesidere, palásiu governu nia sorin. Bainhira para foti nia katana hasai nu'u kulit kua halo modelu kanuru hodi prepara ba nia kliente sira ne'ebé mai hola nu'u.
Cornelio halo nia kna’ar ne'e, durante tinan ida ho balun ona bainhira situasaun pandemia Covid-19 namanas iha mundu inklui Timor-Leste, ho atividade ne'e bele responde nia nesesidade bázika. Bainhira Covid-19 tama iha Timor-Leste, Governu deside kedan Serka Sanitária no Konfinamentu Obrigatória atu hapara atividade, inklui mós eskola labele hala'o aula prezensiál sira nune'e eskola sira hahú implementa aula online iha territóriu tomak.
Tanba aula online ne’ebé hala’o presiza rede internet ho pulsa, nune'e Cornelio deside ba fa’an nu'u hodi bele responde nia nesesidade, tanba situsaun pandemia transporte públiku no privadu hotu la halo movimentu husi Munisípiu mai kapitál Dili no husi Dili Ba Munisípiu.
Husi ne’e, Corneliu nia família labele haruka osan ba nia hodi sosa pulsa atu tuir aula online no hamenus naha todan husi nia inan aman iha Munisípiu sira moris hanesan Agrikutór.
"Ha’u halo serbisu (fa’an nu'u) ida ne'e, ba ha’u-nia an rasik, la’ós ba ema seluk no ba família sira, ha’u servisu ida ne'e oinsá atubele hamenus serbisu todan ba ha'u-nia mama ho papa iha foho, hodi responde ba nesesidade bázika ne'ebé ha'u iha, tanba ha'u-nia Mama ho Papa sira, ami moris nu'udar vida agrikultór nune'e susar tebes atu hetan osan. Osan ne'e ha'u uza ba ha'u-nia nesidade bázika mak hanesan, sosa pulsa hodi tuir aula online, nomós hola ha'u-nia sasán haris nia hanesan, sabaun, sampo, rinso no nesesidade sira seluk”, informa Cornelio bainhira dadalia ho Jornalista www.tempotimor.com iha Lesidere, domingu (25/07).
Maske loron matan komesa aas ho nia manas kona isin lolon, kosar wen turu ba isin, maibé Cornelio nafatin hein kliente (ema sira sosa nu'u) la sente kabun komesa lian tanba oras meudia nia atu hán, nune'e Cornelio hases-an husi nia serbisu fatin hodi hola ai-hán.
Oras nafatin la'o, la sente loron nia naroman muda-an beibeik, rai komesa nakaras, loron matan hahú falun ho nakukun, Cornelio tenke haloot sasán, maske ema la dun hola nu’u ne’ebé fa’an, maibé nia tenke haloot sasán dadaun ona hodi bele fila ba uma, tanba nia mós hela ho nia tiu.
Husi ne’e, Cornelio aruma sasán hotu, kontinua hakat neineik hodi dudu nia karosa tuir dalan fila ba uma iha Komoro, tanba oras la’o dadaun matan hafalun ona ho kalohan metan.
Bainhira to’o iha uma Cornelio mós halo planu oinsá bele hetan nu’u hodi fa’an nafatin iha loron tuir mai, tanba husi atividade ne’e mak bele sustenta-an kontinua estudu iha universidade. (*)
