"Ami-nia suku ne'e aldeia hamutuk 11 ho totál uma-kain 679 mak seidauk asesu liña eletrisidade, entaun ne'e problema oituan ba ami-nia komúnidade atu asesu informasaun iha nível nasionál, tanba agora ne'e situasaun pandemia Covid-19 nia laran, maibé oinsá mak sira atu asesu informasaun se ahi (eletrisidade) laiha, inklui dezenvolvimentu iha rai laran mós sira la asesu”, dehan Xefe suku Sagadate, Aureliano De Jesus, liuhusi telefone, kuarta (28/07).
Maske proposta hato'o ona ba parte relevante sira maibé to’o agora seidauk iha resposta. Tanba iha tinan 2018 komúnidade sira ne'ebé la asesu liña eletrisidade ne'e iha inisiativa rasik tau osan hamutuk hodi ba tula airin Liña Eletrisidade nia iha Dili.
Husu mós ajuda ba parte tékniku sira atu ba sukat hotu ona rai no komunidade sira kee hotu ona kuak airin nia maibé to’o agora seidauk hari’i ka seidauk dada liña eletrisidade.
Tanba sujere ba parte relevante sira atu tau atensaun ba problema sira ne'ebé komunidade sira enfrenta iha baze liliu uma-kain 679 ne'ebé la asesu liña eletrisidade, tanba komúnidade sira presiza tebes informasaun iha nível nasionál to’o iha baze:
Nune'e Xefe Aldeia Sire-bu'u, Caitano da Silva, lamenta tebes ho situasaun ne'e, tanba atu asesu Iiformasaun ba dezenvolvimentu rai laran labele.
"Ami la hatene dezenvolvimentu iha rai laran ne'e la'o oinsá, tanba ami laiha liña eletrisidade entaun ami la haree informasaun sira iha televizaun, tanba ne'e husu ba parte relevante sira atu toma atensaun ba problema refere”, nia dehan.
Entretantu suku Sagadate ho nia totál populasaun hamutuk 3.485 ho nia aldeia 11, iha uma-kain 786 no ina uma-kain ne'ebé seidauk asesu liña eletrisidade hamutuk 679. (*)