Tempotimor (Dili)-Kooperativa Kafé Timor (CCT) husu Prezidente Repúblika, Francisco Guterres 'Lú Olo' atu apoiu sensibiliza informasaun no materiál ba komunidade hodi dezenvolve kafé.

Jerente Kooperativa Kafé Timor (CCT), Moises do Rego, husu Prezidente Repúblika, Francisco Guterres 'Lú Olo' apoiu emtermus de formasaun ba komunidade  la bele tesi kafé arbiru no mós material ba kuda Kafé.

“Ami husu Prezidente nia apoiu morál nomós inmaterial no inspirasaun komunidade nian kona-ba kafé nia folin”, dehan nia iha CCT Postu Administrativu Maubise, Munisípiu Ainaro, segunda (16/08).

Maibé iha difikuldade folin nomós tanba hola kafé ho tempu udan hanesan ne'e sei la bele akumula hotu.

Kona-ba rezultadu produsaun kafé tinan ida ne'e as liu duké tinan rua nia kotuk tanba iha tinan 2021 ne'e CCT hetan ona tonelada rihun-19.

“Ami-nia kafé organik ne'e atu halo exportasaun ba mundu la'ós iha Timor maibé iha nasaun ne'ebé ohin loron ita parseiru hela ba hanesan iha Europa Asean”, informa nia.

Enkuantu Kooperativa Kafé Timor husi iha munisípiu Ainaru, Manuhafi, no Aileu iha ema hamutuk 50.  

Xefe Casa Sivil Prezidnete Repúblika, Francisco Maria de Vasconselho hatete, preokupasaun hirak ne'e sei haruka ba ministériu relevante sira atu oinsá bele haree.

“Ha'u ohin simu proposta husi sira maibé ami, Prezidente Repúblika la'ós ezekutivu. Ha'u simu proposta depois sei inkamiña ba Ministériu sira ne'ebé kompetente iha área ida ne'e atu tau matan”, dehan nia. (*)