MAE Sei Promove Partisipasaun Komunidade iha Dezenvolvimentu Aldeia

Ministru Administrasaun Estatál (MAE), Miguel Pereira de Carvalho. Ministru Administrasaun Estatál (MAE), Miguel Pereira de Carvalho. Foto Suplay

Tempotimor (Dili)-Governu liuhusi Ministériu Administrasaun Estatál (MAE) sei promove partisipasaun komunidade nian ho atividade dezenvolvimentu sósiu ekonómiku sira husi apoiu subsídiu ba aldeia ho Programa Movimentu Hafoun (Rejenerasaun) Aldeia” (PMOHA).

Ho subsídiu ne'e, MAE sei atribui liuhusi programa "Movimentu Hafoun Aldeia", ne'ebé Governu halo ona aprovasaun ba dekretu lei ida liuhusi reuniaun konsellu ministru ne'ebé hala'o ohin, kuarta (01/09) iha sala auditóriu ministériu finansas.

"Ohin (01/09), konsellu ministru diskute programa Movimentu Hafoun Aldeia. Pograma ida ne'ebé mak sei implementa iha aldeia Pilótu sira, programa ida ne'ebé mak hakarak promove partisipasaun ita-nia komunidade sira iha aldeia. Programa ida ne'ebé mak promove voluntarízmu iha aldeia sira liuhusi Governu subsídiu apoiu balu ba aldeia sira, para ke sira bele dezenvolve atividade sósiu ekonómiku oioin iha aldeia", dehan Ministru Administrasaun Estatál (MAE), Miguel Pereira de Carvalho, iha Ministériu Finansas, Ai-tarak Laran, Dili, kuarta (01/09).

Projetu Dekretu Lei ne’e, define rejime jerál husi Programa Movimentu Hafoun (Rejenerasaun) Aldeia” (PMOHA) no estabelese ninia prinsípiu orientadór no kondisaun sira ezekusaun nian.

Programa ida ne’e rezulta husi asinatura, iha tinan 2016, memorandu entendimentu ida entre Saemaul Undong husi Repúblika Korea Súl no Governu Timor-Leste, tuir saida mak implementa ona iha programa esperimentál iha aldeia haat husi Munisípiu Lautem, iha kuadriéniu husi tinan2016 ba tinan 2020.

Ho diploma ida-ne’e kria rejime jurídiku hodi fundamenta implementasaun programa iha nivel nasionál. Tanba PMOHA ne’e atu promove no dezenvolve atividade ekonómika komunitária sira, atu alkansa retornu ekonómiku no empeñamentu komunidade sira-nian ba nível aldeia, ne’ebé diresiona esforsu individuál ba proveitu komún.

Programa ida ne'e, atu promove relasaun ne'ebé mak di'ak liután entre administrasaun lokál sira estadu nian ho komunidade sira iha nível aldeia.

Tanba ne'e, prosesu ba dekretu lei sei kontinua lori ba Prezidente Repúblika, Francisco Guterres 'Lú Olo', atubele análiza no promulga.

"Purtantu, ha'u labele ko'alia barak lai, tanba ne'e sei iha hela faze de aprovasaun iha Governu, ha'u hanoin kuandu aban bainrua karik dekretu públika ona ba mak, ha'u bele ko'alia detalladamente kona-ba programa ida ne'e", dehan nia.

Entretantu, planu MAE nian atu aloka orsamentu ba aldeia pilótu sira ne'e, hodi insentiva de'it komunidade sira atu promove partisipasaun komunidade sira nian iha dezenvolvimentu atividade sósiu ekonómiku iha sira nia hela fatin, nune'e bele promove voluntarízmu. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« November 2021 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30          

Tempo Timor Networks

Online Counter