"Ami kontente, tanba nia mak ema boot husi kooperativa ida ne'e, atubele motiva ami nafatin, haree kondisaun kooperativa nian, nune'e sé buat ruma falla, ajuda ami nafatin, atu ami bele ejiste nafatin ba oin, hodi dezenvolve ami-nia an, molok atuba nível ne'ebé sa'e ba leten", dehan Sekretáriu Kooperativa CU Moris Foun, Jacob Dumarain Zacarias, iha Aldeia Titilari, Suku Fuiloro, Postu Administrativu Lospalos, Munisípiu Lautein, sesta (17/09).
Kooperativa Crédito Uniăo Moris Foun, hari’i iha loron 09 juñu 2002, iha resintu Dom Bosco Fuiloro, ho atividade rai no empresta osan ba membru sira ne'ebé sai membru ona.
Montante osan jurus husi osan ne'ebé fó empresta ba membru sira, bazeia ba kondisaun no situasaun iha sira-nia munisípiu Lautein.
"Ne'ebé uluk, nia funan ne'e nafatin, to'o iha fevereiru ami muda tiha, U$200 mai kraik, 2% hatun. Depois U$2.100 to'o U$10.000 hanesan ne'e 1%", esplika nia.
Durante tinan 19 sura husi tinan 2002 to'o 2021, akumula ona membru ativu hamutuk na’in-443, no akomoda ona kapitál finanseira hamutuk rihun US$290, no tuir tarjetu katak, hafoin fulan-Setembru remata, karik sira tenke atinje to'o rihun US$3 (U$3 mill).
Dezafiu ne'ebé membru sira hasoru iha kooperativa CU Moris Foun, ida mak seidauk iha sede rasik, menus kapasitasaun umana, no husu ba SEKoop atu halo monitorizasaun bebeik ba sira-nia fatin kooperativa.
"Primeiru, ami husi área edukasaun ne'ebé la'ós kooperativa, maibé ami espíritu iha, tanba ami husi tempu Indonézia, atu treinamentu ba kooperativa ida ne'e duni to'o mai iha tempu ukun-an. Dazafiu ida boot liu ne'e mak, to’o ohin loron ami-nia edifísiu seidauk iha, segundu mak presiza formasaun, atu nune'e buat ne'ebé ladun di’ak karik, haloos nafatin, atu ami ba oin nafatin. Servisu hotu la’o di'ak nafatin, maibé presiza akompañamentu", informa nia.
Sekretáriu Estadu Kooperativa (SEKoop), Elizário Ferreira esplika, objetivu husi nia vizita, atu hafanun liután membru sira, hodi hala'o servisu ho di'ak ba oin nafatin.
"Ha'u mai ne'e atu vizita imi, rona imi-nia problema, imi-nia problema, solusaun saida mak imi bele halo. Tanba ami konkluzaun ne'ebé mak foti mak, ida akompañamentu ne'e mak menus. Tanba ida ne'e mak akompañamentu mak sei aas liu. Ida ha'u vizita bebeik ne'e mós, akompañamentu mak ne'e, motiva ema mai bebeik sai membru barak liu", dehan nia. (*)
