Iha Serimónia abertura ne'e, Sekretáriu Estadu Kooperativa (SEKOOP), Elizário Ferreira hatete, objetivu husi semináriu ne'e atu atualiza Serbisu OMM durante iha terenu.
“Objetivu dahuluk mak atualiza OMM sira-nia hanoin, atu sira bele lori hanoin ne’ebé inovativu no produtivu ba sosiadade, atu eduka sosiadade sira bele hola parte iha vida cooperativa no daruak mak atu avalia fila fali OMM sira-nia funsaun durante fulan neen (6) servisu iha kampu, kontribuisaun saida mak sira fó, dezáfiu saida mak sira infrenta, no progresu hirak ne’ebé mak atinje iha baze durante durante iha baze. Hodi nune’e servisu kontinuasaun bele asegura servisu sira ne’ebé fó benefísiu ba ita-nia povu, no mobiliza ita-nia povu hola parte iha vida kooperativa” hatete Elizário ba Jornalista sira iha Salaun Katedral S. José Vila Verde, tersa (20/12).
Bainhira halo komparasaun karik durante tinan 2021 progressu dezenvolvimentu kooperativas boot tebes, iha tinan 2020 kooperativa kréditu (CU) hamutuk 91, kompara tinan 2021 iha ona kooperativa kréditu hamutuk 114, kooperativa kréditu sira ne’ebé tinan barak ladun funsiona, maibé agora funsiona filafali.
Maske husi sira ne’e, hela de'it tolu ka ha’at hanesan ne’e mak sei iha problema kontabilidade. Iha tinan 2020 Kooperativa Produsaun hamutuk 69, ba tinan 2021 kooperativa produsaun 169 ne’ebé funsiona ho di’ak.
Aliende ne’e lori mós matéria Despezas no títulu reseita família nian ba OMM no movimentu kooperativa sira, nune’e bele intende di’ak liután oinsá mak bele poupa osan ho di’ak.
Diretór Jerál Kooperativas, Francisco Xavier husu partisipante sira atu aproveita didi’ak oportunidade osan mean ne’e, no fila karik ba implementa iha ida-idak nia fatin.
"Tenke aproveita didi’ak tanba tempu ida ne'e tempu ida ne’ebé di'ak tebetebes kuidadu hanesan osan mean, bainhira imi fila ba terenu imi aplikasaun ba dirijente kooperativa sira iha imi-nia fatin”, dehan Francisco Xavier.
Partisipante sira ne’e, mai husi postu administrativu sira hamutuk ema na’in-rua, postu administrativu 65, nomós husi movimentu kooperativa hamutuk 70 resin.
Formasaun sei hala’o durante loron tolu nia laran hahú husi 20 to’o 23, fulan-dezembru 2021. (*)
