Iha Serimónia Tomada Posse ne'e Prezidente CU FATUMA, Juliana Imaculada, husu ba SEKOOP atu kontinua fasilita formasaun akuntabilidade hodi lori Kooperativa ne'e ba oin.
"Nu'udar autoridade rekomenda hela ba sua eselénsia, treinamentu ne'e labele para de'it iha ne'e, tanba ami ema foun foin hakat passu ida ami mós seidauk domina kona-ba kontabilidade, tanba osan ne'e problema boot ida moos, se ami laiha formasaun ami labele iha koñesimentu iha kontsbilidade”, dehan nia iha Sede Suku Mankasa, Postu Administrativu Lekidoe, Munisípu Aileu, sábadu (15/01).
Tanba formasaun sira ne'e bele ajuda, estrutura Kooperativa sira, hodi bele lori membru sira hodi tane sa kooperativa sira oinsá mak bele jere nia osan di'ak iha kooperativa nia laran.
Alende ne'e membru Kooperativa CU FATUMA ne'e la mai husi ema iha nível edukasaun boot maibé mai husi ensinu Primaria, Pre-Sekundaria, Sekundaria inklui mós alfabetizasaun sira.
Nune'e Sekretária Estadu Kooperativa (SEKOOP), Elizário Ferreira, enkoraza nafatin kooperativa sira atu badinas hodi hamosu ideia hodi kontribui ba Kooperativa nia destinu iha CU FATUMA ne'e rasik.
"Credito união ne'e beis member, membru mak na'in ba kooperativa, kuandu membru aumenta barak osan mós aumenta barak, kooperativa mós bele hakiak manu, hakiak fahi, hakiak karau, hakiak bibi, se mak atu halo?. Nia anggota sira mak halo”, esplika nia.
Nune'e SEKOOP husu ba membru sira atu Empresta osan sira bele hodi halo movimentu ka halo assaun hodi osan sira ne'e labele rai de'it iha banku maibé sirkula iha Kooperativa nia laran.
“Ita-boot sira membru 35 ho osan 18.000.00 ne'e la'ós toba iha ne'e ema ida empresta 1.000 hodi halo hakiak manu, kurau no seluk tan”, salienta nia
Kuandu hakiak animal sira ne'e mak iha ona mudansa pozitivu bele negosiasaun filafali karau ka bibi sira ne'e hodi selu filafali ba Empresta iha kooperativa inklui mós simpanan wajib sira ne'e.
Alende ne'e mós SEKOOP orienta CU FATUMA hodi bele halo rejistu iha notariadu no sai membru mós ba federasaun Hanai Malu, tanba bele fasilita kooperativa sira hodi bele ba oin.
"Primeiru atu orienta ita-boot sira rejistu, husu diresaun atu akompaña nomós imi sai membru ba CU federasaun Hanai Malu, rejistu ho osan US$150.00. US$150.00 ne'e simpanan pokok 100.00 US$25.00 simpanan wajib, no restu ne'e biaya administrasi”, esplika nia.
SEKOOP mós husu ba Kooperativa CU FATUMA atu serbisu maka'as bainhira nia membru to'o 250 nia parte sei apoiu osan 750.000.00 hodi hari’i CU FATUMA nia Sede rasik.
CU FATUMA moris iha tinan 2012, no hamriik mesak iha tinan 2015, no dadaun ne'e iha nia membru Kooperativa hamutuk 37 ho nia osan 18.000 no iha loron (15/01) ofisiál estrutura foun hodi lidera CU FATUMA ba oin. (*)
