Diretór Servisu Munisípal Protesaun Sivil Jestaun Dezastre Munisípiu Baukau Nelson Nunes hatete, iha tinan-2021, rejista uma ne'ebé hetan estragus hamutuk 347.

Iha postu Administrativu Baukau Vila, hamutuk 163 ne'ebé kompostu husi anin sobu 146, uma ahi-han ka insendiu 11 no uma rai hodi halai 6. Postu Laga, hamutuk 22 ne’ebé kompostu husi anin sobu 15 no ahi-han ka insendiu 7.

Baguia, hamutuk 14 ne'ebé kompostu husi anin sobu 13 no insendiu ida. Kelikai, hamutuk 88 ne'ebé anin sobu 33, insendiu 5 no rai hodi halai 46.

Venilale, hamutuk 50 ne'ebé anin sobu 17, insendiu 6, rai hodi halai 25 no uma mota sobu 2. Vemase, hamutuk 10 ne'ebé anin sobu 9 no insendiu ida.

"Apoiu rekuperasaun matérial konstrusaun ba vítima dezastre ba tinan-2021 nian hamutuk 283, Baukau Vila 99, Laga 18, Baguia 18, Kelikai 79, Venilale 60, Vemase 9,"dehan Nelson ba www.tempotimor.com iha kna'ar fatin, segunda (07/02).

Iha tinan-2021 uma ka'in ne'ebé tama iha kriteiru, hetan hotu ona apoiu.

Nune’e. orsamentu ba mão de obra ba uma ne'ebé kondisaun aat totál no natoon hetan US$ 368, kondisaun a'at kamak US$150.

Apoiu emerjénsia ba tinan-2021 totál hamutuk 351 ne’ebé kompostu husi postu Baukau Vila hamutuk 172, Laga 20, Baguia 18, Kelikai 79, Venilale 51 no Vemase 11.

Alende ne'e, iha tinan-2021, Servisu Munisípal Protesaun Sivil Jestaun Dezastre Baukau hamutuk ho parseiru World Vision Baukau mós, lansa ona estrutura komisaun jestaun risku dezastre iha Postu Administrativu Vemase.

"Ne'e atu iha kordenasaun di'ak husi kraik mai leten, atu evita informsaun ne'e, direita ba nasionál, mais liuhusi estrutura ne'ebé iha atu bele servisu fasil no mós servisu iha koordenasaun la'o di'ak bainhira dezasre ruma mosu, kada komisaun ida-idak hatene nia papél ona servisu tuir estrutura ne'ebé iha," nia hatete.  

Entertantu fundus ne'ebé mak Autoridade Munisípal aloka ba dezimiña informasaun reduz dezasre naturais hamutuk US$793 no orsamentu ba estabele komisaun iha postu vemasse fundus husi parseiru world vision. (*)