“Workshop ne'e hanaran projetu hadalan-II hodi kria espasu atu promove grupu produtivu sira liuhusi Dezenvolve Plataforma Online, nu'udar meiu ida hodi públika atividade grupu produtivu sira-nian iha setór agrikultura, nune’e bele dezenvolve ekonomia diversifikada no sustentavél iha Timor-Leste”, esplika Sekretáriu Ermera Ai-kulat Mutin Organiku (EAMO), Januario Goncalves, iha fatin Timor Plaza, (22/02).

Tanba ne’e sente kontente ho oportunidade ne’e, tanba ba oin Alumi Parlamentu foinsa'e bele ajuda ona promove sira-nia produtu lokál iha pájina mídia sosiál.

“Ami agradese ba APFTL no OXFAM, ne'ebé servisu maka'as tebes bele konvida ami grupu produtuvu sira, ami hakarak espresa sentimentu orgullu tanba durante ami hatene de'it katak halo produsaun asaun iha de'it baze”, afirma nia.

Projetu ne’ebé ho naran Hadalan lori grupu produtivu agrikultura sira ba plataforma online ka mundu téknolojia, atu promove produtu lokál iha mídia online hadalan, ne'e loke espasu di'ak tebe ba grupu produtivu agrikultura no agrikula sira.

“Plataforma online ne'e atu hafasil ami-nia produtu agrikula, la'ós ona husi ibun ba ibun mak hatene ami-nia produtu, maibé liuhusi mídia hadalan ne'ebé kria husi APFTL no OXFAM ne'ebé organizaun sira prepara atu hafasil liután ami-nia produtu lokál ne'ebé iha, liuliu iha marketing nian”, esplika nia.

Tanba ne’e, hanesan faze konsultasaun ida ba grupu sira oinsá nia prosesu ne'e ba oin, maibé mídia ida ne'e bele hafasil tebes produtór, no prontu koopera ho kompaña ne'e ba oin.

Prezidente Alumi Parlamentu Foinsa'e Timor-Leste (APFTL), Jaulino Gomes da Silva hatete, workshop ne’e halo ba grupu produtivu Munisípiu sira diferente hanesan Ainaru, Aileu, Baukau, Ermera no Dili.

“Workshop ne'e nia intensaunatu konsultasaun ida ba grupu produtivu sira oinsá introduz plataforma online ne'ebé APFTL dadaun dezenvolve hela ba mídia hadalan, uza oinsá halo advokasia”, dehan Julino iha Timor Plaza, tersa (23/02).

Nune’e halo konsultasaun atu husu grupu produtivu sira-nian opiniaun no ideia, tanba plataforma ne'e na'in mak grupu produtivu sira, APFTL halo kontrolu de'it ba públika informasaun kona-ba produ agrikula, turizmu, artezematu no menus sira seluk.

Liuhusi mídia ida ne'e konsumidór ho públiku ka emprezáriu sira ne'ebé iha interese bele asesu ona grupu produtivu sira-nia produtu, sira bele asesu iha plataforma ne'e bele hatene ona produtu ida nia presu ne'e, fatin iha ne'ebé, sira-nia estok ne'e iha ka la’e, konsumidór sira bele haree direita.

Grupu ne'ebé partisipa iha workshop ne'e, grupu Hatajo, Tilofe, FJDE, Eamo, Conver Story, Yeff, Jovra no Unaer, nomós grupu produtivu husi Munisípiu Ainaru, Aileu, Baukau, Dili no Ermera. (*)