Bazeia ba polítika governu daualu nian ne'ebé apoiu sesta bázika ba povu Timor-Leste iha periodu Covid-19, mak kompañia hamutuk ministériu relevante sira halo ona distribuisaun ba povu maioria iha Timor-Leste.

Maibé, Suku Poetete iha aldeia sanulu-resin-rua hanesan, Aldeia Vila, Biluli, Gueguemara, Leqisi, Loblala, Poepun, Rematu, Samatrae, Taklela, Tidibessi, Urletoho, no Urluli.

Xefe Suku Poetete, Felisberto das Neves hatete, distribuisaun sesta bázika ba komunidade Poetete ne'ebé responsavél husi kompaña Ermera Tuan seidauk realiza, tanba dadus husi aldeia vila seidauk loos.

Totál populasaun iha suku Poetete ne'ebé haruka ba ministériu relevante hamutuk 1.007, maibé kontratu finansas ho kompaña Ermera Tuan haruka dadus mai suku iha de’it 737, nue’e komunidade Poetete hela na'in-270 mak lahetan ai-haan sesta bázika.

“Failansu iha kontratu, afeta sesta bázika tanba dadus aldeia vila la hanesan ho dadus ne’ebé haruka ba, entaun parte finansas mak halo kontratu hodi hamenus dadus ne’ebé iha, nune’e ha’u relata ona ba parte relavante no estatál atu haree didi'ak dadus refere hodi aldeia vila bele hetan hotu”, dehan nia ba www.tempotimor.com iha kna’ar fatin Ermera Vila, kuarta (17/03).

Komunidade iha suku Poetete simu sesta bázika hahú iha loron 15 fulan-janeitu, tanba ne’e iha aldeia lima mak hetan ona, maibé aldeia hitu mak seidauk inkluinaldeia vila.

Tuir planu kompaña pruntu atu responde hotu, maibé kestaun orsamentu husi governu nian, selu ona ba parte fornesedór ka seidauk?. Karik selu ona kompaña bele kontinua, maibé karik la’e, kontinua hein ba governu.

Autoriedade lokál ne'e mós apela ba komunidade katak, ema ne’ebé seidauk simu nafatin hein, maske demora maibé hothotu sei simu no sira ne’ebé la hetan mós sei hetan.

Entretantu totál populasaun suku Poetete hamutuk rihun 11.784 ne'ebé kompostu husi aldeia 12.(*)