“Ohin ne'e, deputadu parlamentu sira husu atu aprezenta proposta konkretu, ami aprezenta ona ba parlamentu atu elabora, diskute hodi inklui iha projetu lei radiu difuzaun ne'ebé mak sira prepara”, dehan Ministru Asuntu Parlamentar no Komunikasaun Sosiál, Francisco Martins da Costa Pereira Jerónimo, iha PN, kinta (24/03).

Governu aprezenta proposta konkretu ne'e tanba iha projetu lei foun ne'ebé Komisaun A kria la mensiona kona-ba meiu komunikasaun sosiál hanesan doutrináriu tuir lei komunikasaun sosiál nian.

Tanba Lei Komunikasaun Sosiál númeru 4/2014, artigu 23º kona-ba meiu sira komunikasaun sosiál ne’ebé la hó fin lukrativu hanesan radiu komunitáriu, asosiativu, konfesionál no doutrináriu ne'e lei mak sei regula, maibé doutrináriu la mensiona iha projetu lei foun.

Nune'e Governu mai atu esklarese ba parlamentu hodi fó atensaun ba radiu komunitáriu sira, tanba ne'e mós importante iha prosesu ne'e hotu.

“Ne'e mak ohin deputadu parlamentu sira husu atu aprezenta proposta konkretu, ami aprezenta ona atu elabora, diskute hodi inklui iha projetu lei ne'e”, hatete nia.

Iha Lei radiu difuzaun ne'e iha artigu hamutuk 51, ne'ebé ko'alia barak kona-ba radiufónika nomós televiziva.

Maibé prosesu atu regulariza sira-nia funsionamentu iha futuru ne'e mak iha ne'e mós ko'alia kona-ba oras mínimu atu aplika ba radiu ho televizaun sira katak sira-nia funsionamentu normal mínimu mak oras 8 maibé depende ba sira hakarak funsiona to'o 24 oras mós bele.

“Se ema barak hakarak loke ka hari’i radio ka televizaun mak la prienxe oras mínimu 8, seidauk bele, tenke oras mínimu ne'e ualu, másimu ne'e depende, 24 oras mós ok, maibé mínimu ne'e oras ualu”, afirma nia. (*)