“Ohin ne'e, ita bele dehan katak faze komunikasaun entre Governu ho komunidade ne'ebé hela iha Bairo Seroja. Tanba ne'e mak ohin sira konkorda ona, orsida loraik tuku 2, tékniku sira sei mai filafali, atu halo survei, foti dadus, para identifika, uma-ka'in hira mak afetadu”, dehan Vise Ministru Obras Públika (MOP), Nicolão Lino Freitas, hafoin diálogu ho komunidade sira iha Bairo Seroja, sesta (01/04).

Ba kada komunidade afetadu hetan kompesasaun depende ba levantamentu dadus, tanba ekipa husi Ministériu Obras Públika, rekolla hela dadus kona-ba sasán no uma hira mak sei hetan afetadu iha Bairo Seroja.

"Uma-ka'in hira, kada um-ka'in ida kona ai-horis hira, rai hira, uma tipe hira, entaun husi dadus mak ekipa tékniku sira husi MOP, diresaun nasionál edifikasaun, katak sei responsavel hodi halo kalkulasaun, ho orsamentu iha ona, mak ita bele lori ba aprova, para bele selu wainhira konkordánsia entre komunidade ho Governu iha ona”, esplika nia.

Maibé ekipa ne'ebé halo identifikasaun sei prepara iha tempu badak, atubele hato'o filafali ba Ministériu Justisa no Ministériu Obras Públika, hodi halo reuniaun konsultasaun públiku ho komunidade sira katak totál komunidade ne'ebé afeta ba dezenvolvimentu estrada (trousu) husi Tasitolu ba Tibar mak ida ne'e.

Ho konstrusaun estrada husi Komoro ba Tibar, tuir loloos, Eskola São Minguel mak afeta, la'ós komunidade Bairo Seroja, maibé atu rezolve Eskola São Minguel nu’udar seitór privadu ne'ebé kontribui ba dezenvolvimentu liuhusi área edukasaun, entaun hato'o karta ba Ministériu Justisa atubele identifika rai ba sira hodi konstrui.

Ho ida ne'e, Governu Sekretáriu Estadu Terra no Propriedade (SETP) halo analizasun no identifikasaun ba rai Estadu nian ne'ebé sei mamuk, maibé felismente identifika duni rai iha Bairo Seroja ne'ebé mak sei mamuk hela atubele oferese ba Eskola São Minguel.

Antes ne'e, Governu konsege rezolve ona komunidade Uma-kain 143 ne'ebé mak afetadu ba trousu ida ne'e, no konsege fasilita konpesasaun ho orsamentu rihun $700.

“Agora ba São Minguel nian, purvolta $800 mil, mais ba kompesasaun ita sei hein depende rekolla de dadus”, hatete nia.

Ba problema sosiál ne'e bainhira Governu rezolve ona, mak konstrusaun estrada ka trosu ne'ebé iha, automatika Govenru rezolve.

"Ne'ebé problema sosiál ne'e, hola parte ida hodi afeta ba dezenvolvimentu mais agora Governu tenke, iha estratejia ida para koordena ho komunidade, tera no propriedade, para rezolve asuntu problema sosiál ida ne'e”, esplika nia. (*)