“Parte terras propriedade halo ona levantamentu ba fatin hirak ne'ebé durante ne'e sira halo gratuita, Ótel Timor, Pertamina, Ensul, no sira seluk tan ne’ebé afinál durante ne'e uza rai uma estadu gratuita no hetan benefisiu barak”, deklara Ministru Justisa, Tiago Amaral Sarmento, iha Rezidénsia Ofisiál PM, Farol, sesta (22/04).

Tanba ne’e hasoru malu ho Primeiru Ministru hadi hato’o informasaun kona-ba atividade sira, liliu asuntu arendamentu ba uma rai estadu, ne'ebé Kompaña sira la selu, iha tempu badak sei notifika ba sira hothotu atu konvinda sira ko'alia tuir lei.

“Bainhira la kumpri nafatin ida ne'e sei hetan partisipasaun iha Ministériu Públiku tanba viola ona lei tributaria, fradu fiskál, no konsumu krime”, dehan nia.

Ba parte sira ne'ebé durante ne'e uza rai uma estadu mak la selu, ne'e krime tanba kontra lei tributaria, nune'e fó prioridade ba kestaun arendamentu tanba nia lei kompletu hotu ona, nomós tau prioridade ba oinsá atu fahe sertifikadu nain ba rai, ba sidadaun hothotu.

“Ita-nia lei kompletu ona, ne'e ita kumpri lei, ita obedese ba lei, aplika lei, tanba ita-nia Estadu de direito demokrátiku liliu la justu bainhira ema ki’ikoan no ema baibain mak selu taxa, maibé ema boot sira no kompaña boot sira la selu taxa no hela gratuita de'it iha rai uma estadu, iha kraik ne'ebá povu ki’ik sira, kios kiik sira iha dalan ninin, sira kumpri lei, selu impostu taxa ba estadu, sira hakaas-an maske sira osan laiha, ida ne'e labele, tanba ne'e ita tenke aplika lei, aplika lei hodi sira selu”, afirma nia.

Tanba sira ne'ebé selebra ona kontratu arendamentu rai uma estadu, kompaña boot sira ne'e atu hatene-an no husu ba sira atu kumpri sira-nia dever, no sira ne'ebé seidauk halo kontratu arendamentu hela gratuita de'it atu kumpri sira-nia dever, hodi bele regularize-an tuir lei ne'ebé kompletu ona.

"Ba Kompañia hothotu ami alista hotu, semana oin notifiaksaun sei tun, sei konvida sira, e husu atu kumpri, se la kumpri tanba saida, tanba ida ne'e halai ona ba kazu krime la'ós ona kazu sivíl ou administrasaun de'it, halai ona ba kazu krime tanba viola ona lei tributaria, la selu pajak (taxa) ne'e krime. Liliu kompaña nasionál no internasionál ne’e lista kompleta, provizoriamente lista hamutuk 82, depois ami identifika tan”, informa nia. (*)