“Ho alterasaun ida-ne’e, define konseitu jestaun operasionál no permite katak Fundu Rezerva Seguransa Sosiál, diretamente, ka liuhusi Banku Sentrál Timor-Leste ka entidade públika seluk, ne’ebé responsavel ba jestaun operasionál, bele uza kontratasaun ka subkontrasaun husi entidade sira seluk hodi asume funsaun espesífika balu ne’ebé inklui iha jestaun operasionál Fundu nian”, dehan Ministru Prezidensia Konsellu Ministru, Fidelis Manuel Leite Magalhães, iha Palásiu Governu, tersa (17/05).
Aleinde alterasaun ne’e, klarifika katak ativu sira ne’ebé sei integra iha karteira Fundu Rezerva Seguransa Sosiál nian tenke emite husi entidade sira ne’ebé la aprezenta risku substansiál inkumprimentu, atu garante seguransa ba Fundu ne’e rasik, ho masimizasaun rendimentu nian no minimizasaun risku nian.
Nune'e halo aprezentasaun tan projetu Dekretu-Lei tolu, husi Vise-Primeira-Ministra no MSSI ba Projetu substituisaun SAII husi pensaun sosiál ida ba invalidés no vellise.
“Ho alterasaun lejizlativa ida-ne’e pretende alterasaun sira tuirmai ne’e, Muda konseitu, subsídiu ba pensaun nian, altera ámbitu pesoál, inklui traballadór sira ne’ebé iha sistema kontributivu, maibé laiha direitu ba pensaun, valór prestasaun, ne’ebé garante katak montante pensaun la ki’ik limiár internasionál probreza nian, la akumula ho rendimentu seluk, prioridade husi pagamentu sira, ne’ebé halo pagamentu semestrál ba pagamentu mensal”, esplika nia.
Projetu ne’ebé estabelese valór mínimu sira ba pensaun mínima invalidés no vellise nian husi rejime kontributivu, objetivu husi proposta ida-ne’e mak atu garante pensaun mínima ida, tuir karreira kontributivu traballadór sira-nian.
“Projetu kriasaun Servisu Verifikasaun Inkapasidade sira, objetivu husi projetu ne’e mak atu kria servisu ida ne’ebé bele sertifika situasaun sira inkapasidade ba serbisu nian, atubele atribui prestasaun sosiál sira”, dehan nia. (*)