“Sua eselénsia Prezidente mós husu Konsellu Superior Majistratura Judisiál atubele halo esforsu ne’ebé di’ak para bele kria tan kondisaun di’ak liu ba juís sira nomós ba ema seluk ne’ebé servisu iha Tribunál para fornese justisa ne’ebé besik liu no di’ak liu ba povu”, dehan Prezidente Tribunál Rekursu, Deolindo dos Santos, hafoin audénsia ho PR Lú Olo iha Palásiu Prezidénsia Bairopite, tersa (17/05).
Husu mós ba tribunál sira atu funsiona ho forma ne’ebé di’ak nafatin atubele fó justisa ne’ebé di'ak ba povu Timor, la haree ba kór ema ida-idak nian.
Ba preokupasaun ne'e, Prezidente TR haree katak enprinsípiu tribunál nia servisu sira la’o hanesan baibain no la’o di’ak, to’o la’o di’ak liután ho atendimentu sira ne’ebé tribunál sira halo espesialmente iha tribunál balu ne’ebé nia prosesu ne’e la’o kapas no bele dehan estraordináriu tebes.
Tanba iha tinan hirak liubá, Tribunál Dili, prosesu krime kuaze rihun-tolu-resin no prosesu sivíl hamutuk 2000 resin mak tribunál la konsege atende.
Maibé agora prosesu krime iha de'it 1200-resin, no prosesu sivíl iha de'it 600 ne'e siknifika mudansa ida ne’ebé estraordináriu tebes. (*)