Tuir informasaun ne’ebé www.tempotimor.com asesu iha pájina Ministériu Justisa, kuarta (08/06) katak, Ministru Justisa, Tiago Amaral Sarmento, akompaña husi Diretór Jerál Administrasaun no Politika Justisa, Salvador da Costa Fernandes, halo vizita urjente ba Servisu Rejistu Notariadu Munisípiu Dili, tersa (07/06), hodi halo inspesaun ba servisu atendementu públiku iha fatin refere.
Inspesaun urjente ne’e hodi haree direta problema no dezafius ne’ebé Servisu Rejistu Notariadu Munisípal Dili enfrenta durante ne’e.
Dezafiu ne’ebé iha mak, espasu ne’ebé ki’ik ka klot no ekipamentus informasaun tékniku (IT) nian ne’ebé limita, no liña internet ne’ebé ladún di’ak ka la estavel, inklui menus rekursu umanu iha Diresaun munisípal Dili, liliu téknika ba servisu prosesa emisaun dokumentu nian.
Ho nune’e, Ministru Tiago orienta kedas ba Diretora Servisu Rejistu Notariadu Munisípiu Dili nian hodi kooerdena ho Diretór Jerál Rejistu Notariadu hodi bele muda kedas funsiunáriu haat no ekipamentu mai hodi haforsa Servisu Rejistu Notariadu Munisípiu Dili nian.
Iha ne’e, Ministru Justisa orienta mós Diretor Jeral Politika Justisa nian hodi haree filafali akordu ne’ebé iha entre Ministériu Justisa ho Childund no UNICEF atu oin-nusa bele halo renovasaun ba koopersaun refere hodi nune’e Servisu Rejistu bebé iha ospitál sira bele kontinua nafatin.
Nune’e bele fasilita bebe sira ne’ebé foin moris bele rejistra kedas iha Ospitál sira nune’e garantia labarik sira iha ne’ebé moris rejistradu ona iha Sentru Saúde sira.
Ba servisu ne’e husu Diretór Jerál Politika Justisa atu koordena ho Diretór Jeral Rejistu Notariadu atubele rekolla mákina ka empresora balun husi fatin sira ne’ebé ema ladun iha, atubele haforsa servisu iha Rejistu Notariadu Munsípiu Dili nian (husi Metinaro).
Iha fulan-maiu Ministru Justisa halo ona reuniaun ho Diretór Jerál servisu Rejistu Notariadu no Diretór Nasional sira iha Rejistu Noatriadu nian inklui Diretora Munisípiu Dili nian atu buka oin-nusa bele solusiona dezafiu ne’ebé diresaun refere enfrenta, tanba volume sidadaun ne’ebé trata dokumentu aumenta barak. (*)
