Prokuradór Jerál Repúblika, José Ximenes hateten, kazu pendente Francisco Kalbuadi Lay ne'ebé notifika ona kontinua iha investigasaun.
"Notifikasaun ba ona, investigasaun la’o nafatin. Se seidauk iha akuzasaun, investigasaun prosesu la’o hela," dehan José Ximenes, iha Palásiu Prezidensiál, Bairru-Pité, Kuarta (12/2).
Nia hatutan, Ministériu Públiku sei kontinua halo investigasaun ba kazu sira seluk inklui kazu Kalbuadi Lay.
José Ximenes akresenta, sei haree provas ba kazu ne’e, bainhira iha prova Ministériu Públiku sei akuza no kuandu laiha sei arkiva.
Entertantu Ministériu Públiku hasai ona karta notifikasaun ba Prezidente Parlamentu Nasionál, Arao Noé de Jesus, iha loron 20 Marsu 2019, relasiona ho arguido membru deputadu CNRT, Francisco Kalbuadi Lay. (*)