PTR Kansela Konstrusaun STJ : Xanana 'Fo, Nia mak Impede'

Prezidente Tribunal Rekursu, Deolindo dos Santos Prezidente Tribunal Rekursu, Deolindo dos Santos
Tempotimor (Dili) - Prezidente Tribunál Rekursu, Deolindo dos Santos hateten, Governu hatún ona desizaun hodi kansela prosesu konstrusaun ba edifísiu Supremu Tribunál Justisa (STJ) no kontinua ho konstrusaun Tribunál Distritál Dili (TDD).

"Espasu ba fatin konstrusaun Supremu Tribunál Justisa no Tribunál Dili desizaun mai husi governu. Hirak ne'e deside no atribui husi governu. Governu rasik maka fó projetu ba Supremu Tribunál Justisa, depois hapara tiha," dehan nia, iha Palásiu Prezidensiál, Bairru-Pité, Segunda (17/2).

PTR informa, kona-ba prosesu konstrusaun ba edifísiu-foun Tribunál Dili rasik deside husi Governu no daudaun ne'e kontinua iha prosesu laran.

"Governu rasik mak deside liuhusi Konsellu Ministru no lori ba aprova finál iha Parlamentu Nasionál kona-ba konstrusaun Tribunál Dili," akresenta Deolindo.

Nia hatutan, prosesu tomak husi SJT no TDD desizaun mai husi Governu liuhusi ajudikamentu kompañia ne'ebé manan projetu konstrusaun rua hanesan STJ no TDD.

Entertantu, prosesu konstrusaun edifísiu STJ kanseladu ona. Tanba PTR Deolindo konsidera veteranu sira ne'ebé maioria timoroan nu'udar mós patrimóniu Estadu ne'ebé presiza respeita no valorize.

Iha parte seluk, tuir fonte www.tempotimor.com, besik Tribunál informa, rai ne'e (eis Camp Phoenix - Forsa Austrália) fó ba Tribunál iha tempu IV governu ne’ebe lidera husi Primeiru Ministru, Kay Rala Xanana Gusmão, maibé veteranu sira ezije ba eis-Komandante En Xefe das FALINTIL ne’e atu intervene hodi foti hikas rai ne'e.

"Balun lori katuas (Xanana) nia naran, halo pedido ba MJ (Ministeiru Justica) Diresaun Terras no Propriedade atu atribui fali rai ne'ebe dezde IV Governu Konstitusionál (ne'ebe lidera husi) PM Xanana liuhusi MJ (Ministra Justica), Lúcia Lobato, atribui ona ba Tribunál atu konstrui Palásiu-da-Justisa, ne'e mak sira mai impede fali, mas tender buat hotu la'o ona, kontratu asina ona, kompañia komesa servisu ona."

"Prosesu to'o hetan kompañia halo servisu ne'e, tender ne'e envolve ministériu sira hotu, konkursu halo iha CNA (Komisaun Nasionál Aprovizionamentu). (Mas) dezde katuas (Xanana) sobu obra iha Kaitehu ne'e mak (veteranu) sira mai atu okupa. Ita esplika ona mas sira ulun moruk nafatin ne'e. (Maibé) kompañia kontinua halo servisu," dehan fonte ne'e.

Nune'e, fonte ne'e dehan, preokupasaun maka impede kompañia ne'e labele halo servisu. (Veteranu) sira reklama Tribunál hanesan fali kompañia seluk reklama Estadu tenke selu.

Fonte ne'e hatutan, dentru tinan 2018 no 2019, Eis-Primeiru Ministru, Xanana Gusmão, hakerek karta ba Tribunál Rekursu atu atribui rai iha área Kaikoli atu halo konstrusaun ba edifísiu Supremu Tribunál Justisa no Kuartél Jerál g7+.

"Maibe foin lalais (hafoin kazu Kaitehu) Xanana Gusmão inklui veteranu balun hakerek fali karta ba Tribunál Rekursu atu kansella konstrusaun ba edifísiu Supremu Tribunál Justisa ne'ebé Governu deside ona atu halo konstrusaun", dehan nia. (*)
 
 
 
Rate this item
(0 votes)
Last modified on Tuesday, 18 February 2020 22:00
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.