Aban 7 Jullu : Alkatiri Sei Hatama Keixa ba MP Kontra CPN-CNRT

Sekretariu Jeral Partidu FRETILIN, Dr. Mari Alkatiri Sekretariu Jeral Partidu FRETILIN, Dr. Mari Alkatiri Foto Suplai

Tempo Timor (Dili) - Sekretariu Jeral FRETILIN, Dr. Mari Alkatiri sei hato’o Keixa ba Ministeriu Públiku (MP) hasoru membru CPN Partidu CNRT sira ne’ebé tuir akuza nia simu subornu husi Kompaña ConocoPhillips.

"Aban, loron-07 fulan-Jullu tinan-2020, iha oras tuku 10 dader HTL, Sekretariu Jeral FRETILIN, Dr. Mari Alkatiri sei hakat ba Gabinete Prokurador Jeral da Repúblika iha Colmera, Dili, atu hato’o ninia keixa hasoru membru CPN partidu CNRT nian sira ne’ebé raut fila fali lixu husi tinan-2002 ne’ebé akuza Dr. Mari Alkatiri simu subornu husi kompaña ConocoPhillips," informa iha Komunikadu de imprensa ne'ebe www.tempotimor simu This email address is being protected from spambots. You need JavaScript enabled to view it..

Koalia kona-ba prosesu ba Ministeriu Públiku, Sekretariu Jeral FRETILIN esplika katak iha tinan barak nia laran ona mak nia sai vitima ba black campaign oioin hahu husi diskriminasaun vitima ba vingansa oioin no vitima ba inveija. Tamba ne’e, Dr. Mari Alkatiri hatete, “tempu to’o ona ba ha’u atu halo apelu ba RDTL nia sistema Justisa.”

“Tempu to’o ona atu fo tempu ba Justisa Estadu RDTL nian,” Dr. Mari Alkatiri subliña.

Dr. Mari Alkatiri hahu ninia luta ba Timor-Leste nia independensia ho otas ne’ebé nurak tebes, seidauk atinji idade tinan 20. Ninia luta ba Timor-Leste nia Ukun Rasik An sei kontinua to’o ohin loron ho idade tinan 70 liu ona.

“Iha tempu naruk ida hanesan ne'e ha’u hasoru dezafiu oi-oin; Dezafiu luta kontra kolonialismu, dezafiu luta kontra espansionismu rejimi Suhartu nian, etc., maibé, dezafiu ida permanente liu no foer liu mai kedas husi ha’u nia maluk timor oan sira balu. Besik tinan lima nulu mak ha’u, ho hau nia familia tomak, sai vítima ba sira. Vítima ba diskriminasaun oin-oin, ba ódiu no vingansa, ba inveja.” Dr. Mari Alkatiri hatete.

Tuir Dr. Mari Alkatiri, hahalok at sira ne’e hasoru nia seidauk para maibé hetok sai boot no forte liu tan. Ate to’o ona iha faze ida ne’ebé mak ema sira ne’e rasik la konsege hafahe entre ida ne’ebé mak lia los no ida ne’ebé mak lia bosok.

“Agora, iha faze ida ne’ebé sira tama ba dezesperu, sira haboot tan sira nia odiu mai ha’u, sira hatudu momos sira nia frakeza, uza lia bosok atu difama, hala'o kalunia ho injuria, atu taka sira nia sala durante tinan sanulu resin rua ukun Timor-Leste. Atu halai husi Justiça, sira buka atu trava FRETILIN nia dalan ba vitória." Dr. Mari Alkatiri esplika.

Tamba ida ne’e duni mak Dr. Mari Alkatiri deside lori keixa ba Ministeriu Públiku hasoru CPN partidu CNRT nian ba lia bosok ne’ebé sira públika hasoru nia.

Tempu to’o ona ba Timor oan tomak atu hatene lia los kona-ba bosok sira ne’ebé partidu CNRT nia estrutura no kuadru balu halo.

“Lia los deit mak dalan diak ba Timor-Leste ida Buras Liu,” Dr. Mari Alkatiri konklui iha komunikadu refere.

Rate this item
(2 votes)
Last modified on Monday, 06 July 2020 18:24
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.