"Juis sira kontinua atende prosesu urjente sira, alende ne'e juis sira barak mós aproveita feriadu ne'e hodi servisu nafatin, entaun sira barak mak la foti sira-nia férias tanba hakarak despaxa lalais prosesu sira ne'ebé akumuladu hela iha sira-nia gabinete," dehan nia, ba jornalista sira hafoin remata enkontru mensál ho PR Lú Olo, iha Palásiu Prezidensiál Bairru-Pité, Tersa (18/08).

Nia dehan, prosesu sira ne'ebé karaktér urjénsia ne'e regra prosesuál mak determina.

"Kódigu prosesu penál mak determina, maibé prosesu sira ne'ebé konsidera urjente ne'e mak hanesan prosesu sumáriu sira ne'ebé juis sira atende imediatu, prosesu interogatóriu sira no mós prosesu balun ne'ebé arguidu prezu ne'ebé halo dilijénsia balun, entaun juis sira ne'e laiha razaun katak atu adia, maibé atende imediatu kedas," Deolindo tenik.

PTR mós afirma, kazu todan iha TR laiha ona, maibé hela kazu normál de'it.

"Kazu todan ne'e laiha ona, hela mak kazu normál la to'o 10. Agora kona-ba primeira instánsia sira ne'e númeru nafatin, tanba iha Baukau sei iha kazu 400-resin kompostu husi kazu sivíl liu 200, iha Suai iha kazu liu 800, iha Oekusi kazu krime liu 500 no kazu sivíl 115, agora Dili nian, kazu krime iha liu 2.000 no kazu sivíl liu 1.000," nia dehan.

Haree ba númeru kazu ne'ebé iha mak Prezidente Repúblika (PR), Francisco Guterres Lú Olo, hato'o nia preokupasaun no husu tribubal atu uza rekursu ne'ebé iha para halo redusaun ba kazu sira ne'ebé iha. (*)