Tuir Prezidente Tribunál Rekursu (PTR) Deolindo dos Santos katak, kamara de kontas finaliza ona auditória balun, maibé iha mós pedidu foun husi governu nian hodi halo auditória iha tinan 2021.

"Ba tinan ida ne'e nian, se la sala aprova ona auditória lima, entaun agora dadaun prevé tan rua atu iha diskusaun ba plenáriu ne'e iha fulan Novembru ninia klaran, entaun fiar katak iha tinan 2020 nia rohan sei finaliza tan auditória rua," dehan Prezidente Tribunál Rekursu (PTR) Deolindo dos Santos iha Palásiu Prezidensiál bairru-pite, Dili, Tersa (20/10).

Nia mós dehan, alende husi auditóriu sira ne'ebé hetan aprovadu ona ne'e, iha mós prosesu balun ne'ebé sei la'o hela no foun balun tama tan.

"Auditória balun la'o hela, balun aprova ona, maibé iha tan pedidu balun ne'ebé mai tan husi governu para halo tan auditória ba instituisaun estadu balun," katak nia.

Nia mós dehan, pedidu foun husi governu ne'e sai la hala'o iha 2020, maibé sei prevé ba tinan 2021 nian.

"Pedidu foun husi governu ne'e sei aprova husi plenáriu kamara de kontas nian para ba 2021 nian, tanba hela fulan rua de'it ona, entaun ita labele halo alterasaun ba tinan ida ne'e nian, entaun prevé ba tinan oin para ita haree pelumenus instituisaun sira ne'ebé mak iha nesesidade atu hetan kontrola husi kámara de kontas," nia tenik.

Prezidente TR mós subliña, pedidu ne'ebé tama ne'e balun despaxa sai ona, maibé tanba sei iha pedidu no seidauk lori ba plenáriu Kamara de Kontas nian para aprova.

"Hodi halo auditória ba saida ne'e ha'u seidauk bele divulga ba ita-boot sira, maibé, bainhira lori ona ba plenáriu kamara de kontas nian para aprova entaun sei publika iha website kamara de kontas nian," katak nia.

Entretantu, tuir dadus ne'ebé www.tempotimor.com asesu iha website kamara de kontas nian katak, auditóriu ne'ebé finaliza ona iha 2020 hamutuk lima, mak hanesan, relatóriu ba auditória númeru 5/2020 kona-ba kontrolu veíkulu estadu nian iha Ministériu Agrikultura no Peskas (MAP) iha tinan 2015 nian, auditória númeru 4/2020 kona-ba kontrolu veíkulu estadu nian iha Ministériu Obras Públika, Transporte no Komunikasaun (MOPTK) iha tinan 2015 nian ne'ebé iha volume ida no rua.

Alende ne'e, iha mós auditória númeru 3/2020 kona-ba inspesaun alimentár no ekonomia husi tinan 2013 to'o 2016, auditória númeru 2/2020 kona-ba kontrolu adiantamentu ba osan husi Ministériu Finansas (MF) iha tinan 2015 no ikus liu mak auditória númeru 1/2020 kona-ba kontrolu veíkulu estadu nian husi Ministériu Finansas (MF) liu-liu iha Diresaun Nasionál Monitorizasaun no Jestaun ba Partimóniu Estadu (DNMJPE) iha tinan 2015.(*)